Сайылык күнэ
Ыам ыйын 22 күнүгэр Е.А.Борисов аатынан киин бибилэтиэкэҕэ «Сайылык күнэ» буолла. 2018 сыллаахха алтынньы 6 күнүгэр Ил Дархаммыт Айсен Николаев ыйааҕынан Сайылык күнүн олохтообута. Сайылык күнэ тыа сирин туруу үлэһит киһитин өрө тутар, инники күөҥҥэ таһаарар, үтүмэн үйэлэри уҥуордаан кэлбит саха омугун үгэһин үйэтитии диэн сыалтан оҥоһуллубут. Былыр сайылык дьиэҕэ көһүөх иннинэ, саха дьоно кыһыны этэҥҥэ туораатыбыт диэн кыстыктарыгар аал уоттарын оттон, дьиэ иччитигэр махтаналлара.
Сайылык күнүгэр бибилэтиэкэ үлэһиттэрэ кэлбит дьону арчылаан, ыраастаан итии саламааттаах алаадьынан көрүстүлэр. Тэрээһин саҕаланыытыгар Валентина Лонгинова сайылык күнүн суолтатын, сиэрин-туомун кэпсээн саҕалаата. Салҕыы Лилия Никитина салама диэн тугун быһааран, салама кырыдаһынын түҥэтэн хас биирдии кэлбит ыалдьыттар бэйэлэрин баҕа санааларын санаан туран салама ыйаатылар. Матрена Захарова таабырын таайтаран сэргэхситтэ.
Бибилэтиэкэ үлэһиттэрэ өбүгэ оонньууларын оонньоттулар. Леонид Афанасьевич Федоров ааптардаабыт сахалыы оонньууларын олус астыннылар, биһирээтилэр. Винокурова Елизавета Николаевна хабылык, хаамыска оонньууларын быраабылаларын кэпсээтэ, маастар кылаас көрдөрдө. Бибилэтиэкэ пуондатыгар бэлэх кинигэ уунна. Тэрээһин сайын кэлбитин уруйдаан оһуохайынан түмүктэннэ.
