Е.А.Борисов аатынан киин бибилэтиэкэ тэрээһиннэрэ
Ыам ыйын 20 күнүгэр И.Е.Федосеев – Доосо аатынан Дирин орто агро оскуолатын 5 кылаастарын үөрэнээччилэрэ ыалдьыттаатылар. Биллиилээх биир дойдулаахпыт, улахан деятель Е.А.Борисов олоҕун, үлэлээн ааспыт үлэтин туһунан билистилэр.
Ыам ыйын 21 күнүгэр киин болуоссакка сайыны көрсө сылын аайы ыытыллар, үгэскэ кубулуйбут «Сибэкки бырааһынньыга» буолла. Дьаарбаҥкаҕа араас оҕуруот аһын, сибэкки араас көрүҥүн рассадалара, талах мастар, дьиэҕэ үүнэр сибэккилэр ону тэҥэ быйыл Чурапчыбыт улууһугар оҥорон таһаарыы сыла биллэриллибитинэн бэйэ оҥорон таһаарар дьарыктаах дьоммут быыстапкалара турдулар. Буоларын курдук сылын аайы үүнээйинэн сөбүлээн дьарыктанар дьоммутугар киин бибилэтиэкэ анал ааттары туттарар ол курдук: «Сэдэх үүнээйи хаһаайынынан» буолла Захарова Надежда Георгиевна, «Дэлэй рассада» — Васильева Наталья Дмитриевна, “Көҕөрдүүнү көҕүлээччи” – Софронова Екатерина Иннокентьевна, «Эдэр оҕуруоччут» — Павлова Айталина Гаврильевна, «Быйаҥы үксэтэр тэрилтэ» (оскуолалар) – С.Д.Флегонтов аатынан Хадаар орто оскуолата буоллулар. Быйылгы тэрээһиҥҥэ сибэкки, рассаада арааһын, талахтарын, олохтоох бэйэ оҥорон таһаарар урбаанньыт дьоммут бордууксуйаларын атыылаһан астыннылар. Быйыл өлгөм үүнүүлээх, быйаҥнаах сайын буоллун.
Ыам ыйын 22 күнүгэр киин бибилэтиэкэҕэ «Сайылык күнэ» буолла. Тэрээһиҥҥэ бибилэтиэкэ үлэһиттэрэр кэлбит дьону арчылаан, алгыстаах алаадьынан айах тутан, салама ыйааһын сиэрин туомун билиһиннэрдилэр. Сахалыы биктэриинэ таайыстылар, ону тэҥэ өбүгэ оонньууларын оонньоон астыннылар.
