Нэдиэлэтээҕи сонуннар
Ыам ыйын 12 күнүгэр Чурапчы улууһун оҕо бибилэтиэкэтин «Төрөөбүт тыл биһигэ» киин иһинэн ыытыллар «Эбэ ааҕар» тэрээһиҥҥэ, киин бибилэтиэкэттэн Саха Республикатын култууратын туйгуна Варвара Ивановна Душкина остуоруйа кэһиилээх ыалдьыттаата. Кини истээччилэринэн, С.А.Новгородов аатынан Чурапчы орто оскуолатын 3 «г» кылааһын үөрэнээччилэрэ буоллулар (кыл.сал. Е. К. Карпова). «Тэбэр Тиэхэ бэтиэхэлэрэ» остуоруйаны бэрт сэргэхтик, ис хоһоонун өйдөтөн аахта. Остуоруйаны оҕолор чуумпуран олорон иһиттилэр, бүтэһигэр ырытыстылар уонна астыммыттарын биллэрдилэр.
Ыам ыйын 14 күнүгэр С.А.Новгородов аатынан Чурапчы орто оскуолатын 7 уонна 10 кылаастарын оҕолоругар Мустай Карим «Радость нашего дома» сэһэнигэр олоҕуран уһуллубут «Сестренка» (режиссер Александр Галибин) киинэтин көрдөрүүтэ буолл. Киинэ иннинэ кэлбит көрөөччүлэргэ ааҕааччыны кытта үлэлиир салаа үлэһиттэрэ киинэ туһунан кэпсээтилэр, тургутук оонньууну ыыттылар. Бастыҥ эппиэттээччилэр минньигэс бэлэх туттулар.
Ыам ыйын 15 күнүгэр киин бибилэтиэкэҕэ Саха Өрөспүүбүлүкэтин үөрэҕириитин туйгуна, РФ суруналыыстарын Сойууһун, өрөспүүбүлүкэтээҕи “Иэйии” КСТ, эргийиэннээҕи «Айар кут» бэйиэттэр, прозаиктар Сойуустарын, «Чурапчы» айар түмсүүтүн чилиэнэ Наталья Сергеева – Аана кыыһа «Ийээ, эн ааккын ааттата…» диэн бастакы кинигэтин сүрэхтэниитэ буолла.
