Е.А.Борисов аатынан киин бибилэтиэкэ нэдиэлэтээҕи сонуннарын сырдатабыт
Ыам ыйын 6 күнүгэр Е. А. Борисов аатынан киин бибилэтиэкэҕэ Чурапчы нэһилиэгин уһуйааннарын доруобуйаларынан хааччахтаах оҕолоругар «Хоһоон хонуута» уус-уран ааҕыы күрэҕэ ыытылынна. Бу күрэҕи оҕо төрөөбүт тылынан ааҕарын көҕүлүүр «Төрөөбүт тыл биһигэ» киин тэрийэн ыытта. Тэрээһиҥҥэ нэһилиэкпит 7 уһуйааныттан 36 оҕо кыттыыны ылла. Бу күрэх оҕону уһуйаан сааһыттан саҕалаан өйтөн ааҕар дьоҕурун сайыннарыыга, төрөөбүт тылга, төрүт үгэскэ уонна кинигэҕэ тапталы иҥэрэр сыаллаах тэрилиннэ. Күрэххэ оҕо суруйааччылара Алексей Татаринов — Удьурҕай «Сахалыы оонньуурдар», Татьяна Винокурова — Сабыйа «Оотой — тоотой оҕолорго», Луиза Андреева «Тыыныы гимнастиката», Иннокентий Сыроватскай — Дүөндүн «Бэйэм ааҕарым үчүгэйин» оҕолорго анаан суруйбут хоһооннорун биирдиилээн аахтылар.
Ыам ыйын 7 күнүгэр Кыайыы күнүн көрсө Е.А.Борисов аатынан киин бибилэтиэкэҕэ Мустай Карим «Радость нашего дома» сэһэнигэр олоҕуран уһуллубут «Сестренка» (режиссер Александр Галибин) киинэтин көрдөрүүтэ буолла. Сэрии кэмин оҕолорун олохторун, бэйэ бэйэҕэ үтүө сыһыаны, кыайыыга эрэли, норуоттар доҕордоһууларын көрдөрөр киинэ мустубут дьону долгутта. Киинэ иннинэ кэлбит көрөөччүлэргэ ааҕааччыны кытта үлэлиир салаа үлэһиттэрэ киинэ туһунан кэпсээтилэр, тургутук оонньууну ыыттылар. Бастыҥ эппиэттээччилэр минньигэс бэлэх туттулар.
Бибилэтиэкэҕэ иистэниэн баҕалаах кэрэ аҥардарга аналлаах маастар кылаас салҕанар . Ол курдук кыргыттар индивидуальнай мерканан выкройка оҥосто үөрэнэллэр. Маастар кылааһы ааҕааччыны кытта үлэлиир салаа бибилэтиэкэрэ Л.Т.Никитина ыытта.
Киин бибилэтиэкэҕэ ыалдьыттар кэлэ тураллар. Ол курдук Туваттан дьиэ кэргэн кэлэн ыалдьыттаата. Бибилэтиэкэни сэҥээрэн көрдүлэр.
Оскуоланы бүтэрээччилэр күннэтэ үгэс курдук бибилэтиэкэҕэ кэлэн консультацияланан экзаменнарыгар бэлэмнэнэллэр.
Киин бибилэтиэкэҕэ Аҕа дойду улуу сэриитин историятын сырдатар, сэрии алдьархайын арыйар, хорсун буойуттары үйэтитэр “История кырдьыга – кинигэлэргэ” кинигэлэр быыстапкалара турда.
