«Ийээ, эн ааккын ааттата… » кинигэ сүрэхтэниитэ
Ыам ыйын 15 күнүгэр Е.А.Борисов аатынан киин бибилэтиэкэҕэ «Алгыс” литэрэтииринэй-музыкальнай салоҥҥа Саха Өрөспүүбүүлүкэтин үөрэҕириитин туйгуна, Арассыыйа суруналыыстарын Сойууһун, өрөспүүбүлүкэтээҕи «Иэйии» коммерческайа суох суруйааччылар тэрилтэлэрин, эрэгийиэннээҕи «Айар кут» бэйиэттэр уонна прозаиктар сойуустарын, “Чурапчы” литэрэтииринэй түмсүү чилиэнэ Наталья Егоровна Сергеева–Аана кыыһа бастакы «Ийээ, эн ааккын ааттата» диэн кинигэтэ сүрэхтэннэ.
Тэрээһин Наталья Устинова толоруугар хомус дьүрүскэн тыаһынан саҕаланна. Ааптар Наталья Егоровна Сергеева — Аана Кыыһа «Уһуйааммын таптыыбын» хоһоонун «Улыбка” уһуйаан улахан бөлөҕүн иитиллээччилэрэ, «Саха тыла — мин баайым» хоһоонун С.А.Новгородов аатынан Чурапчы орто оскуолатын 5-с кылааһын үөрэнээччилэрэ ааҕан иһитиннэрдилэр. Одьулуун нэһилиэгин «Сайдыс» норуот айымньытын дьиэтин сүрүннүүр исписэлииһэ Сайаана Дьяконова ылбаҕай ырыанан эҕэрдэлээтэ. Ааптар Наталья Сергеева — Аана Кыыһа олоҕун, айар суолун уонна саҥа кинигэтин туһунан ыытааччы, киин бибилэтиэкэ сүрүн библиограба Марфа Кузьмина сиһилии билиһиннэрдэ. Наталья Егоровна бастакы хоһоонноро, Чурапчы улуустааҕы гимназиятыгар үлэлии сырыттаҕына «Саҥа олох» хаһыакка тахсыбыттара. Билигин истиҥ, иэйиилээх хоһоонноро өрөспүүбүлүкэ хаһыаттарыгар, уус-уран сурунаалларга утуу-субуу тахсаллар. Наталья Егоровна өрөспүүбүлүкэҕэ ыытыллар хоһоон күрэхтэригэр ситиһиилээхтик кыттар. Саҥа «Ийээ, эн ааккын ааттата” кинигэҕэ сэһэн, кылгас сценка, ырытыылар, хоһооннор, тылбаастар киирбиттэр. Хомуурунньук 2026 сыл муус устар ыйга Дьокуускай куоракка «Долун» хааччахтаммыт эппиэтинэстээх уопсастыба типографиятыгар 50 экземплярынан бэчээттэнэн тахсыбыт. Кинигэҕэ киирбит «Олох, эн кэрэҕин” сэһэҥҥэ аныгы олоххо баар көстүү ойууланар. Быстах түгэнтэн сылтаан олоххо бүдүрүйбүт дьон, эдэр ыал көнөр суолларын булунналларын туһунан итэҕэтиилээхтик суруллубут.
Дьоро күнүнэн кинигэ ааптарын «Чурапчы» литературнай түмсүү чилиэннэрэ, айар биир куттаахтара, үөрүүтүн тэҥҥэ үллэстэн, хомоҕой хоһоонунан эҕэрдэлээтилэр. Одьулуун нэһилиэгин баһылыга Людмила Васильевна Ефремова Наталья Егоровна дойдутун олус таптыырын, барыга көхтөөҕүн, куруук сырдыгынан сыдьаайа сылдьар үтүө майгылааҕын бэлиэтээн туран, саҥа кинигэтин сүрэхтэниитинэн эҕэрдэлээтэ, үтүө баҕа санаатын, махтал тылларын тиэртэ. Биир дойдулаахтара Одьулуун нэһилиэгин бибилэтиэкэрэ Таисия Григорьева, олохтоох ааптар Иван Попов, чугас аймах билэ дьоно эҕэрдэ, алгыс тылларын анаатылар. Е.А.Борисов аатынан улуустааҕы киин библиотека дириэктэрэ Айталина Смирникова кинигэ киэҥ эйгэҕэ тахсар үөрүүлээх күнүн бэлиэтээн, айар үлэтигэр инникитин саҥа ситиһиилэри баҕарда. Оҕо сааһын доҕотторо, үөлээннээхтэрэ, оскуолаҕа, бибилэтиэкэҕэ бииргэ үлэлээбит кэллиэгэлэрэ истиҥник ахтан-санаан, эҕэрдэ тылларын, бастыҥ баҕа санааларын тиэртилэр.
Кинигэ биһирэмэ олус истиҥник, иһирэхтик ааста. Түмүккэ Наталья Егоровна кэлбит ыалдьыттарга бэйэтин махталын бэлиэлэрин туттартаата. Олоххо дьулууру, инникигэ эрэли, саха киһитин үтүө айылгытын арыйар, үтүөҕэ-кэрэҕэ сирдиир сырдык тыыннаах кинигэни сэргээҥ, ааҕыҥ!
