Е.А.Борисов аатынан киин бибилэтиэкэ нэдиэлэтээҕи сонуннара
Ыам ыйын 26 күнүгэр Е.А.Борисов аатынан киин бибилэтиэкэ саалатыгар бибилэтиэкэ күнүн чэрчитинэн ыытыллар «Ааҕааччы бенефиһа», ону тэҥэ «Күннэр-дьыллар, бибилэтиэкэ историята» диэн историяны кэрэһэлиир быыстапка арыллыыта буолла. Бибилэтиэкэттэн сыл устата бэриниилээхтик, ситимин быспакка, элбэх кинигэни уларсыбыт, аахпыт, туһаммыт ону таһынан бэйэтин кылаатын киллэрэн кинигэни бэлэх уунан, көмө оҥорбут ааҕааччыларбытыгар анал ааттар туттарылыннылар.
Ыам ыйын 27 күнүгэр бүтүн Арассыыйатааҕы бибилэтиэкэ күнүн бэлиэтээтибит. Бу күн библиотечнай-профсоюзнай ярмарка ыытылынна, нэһилиэктэр бибилэтиэкэрдэрэ бэйэлэрин ыытар үлэлэриттэн дьоҕурдарын-сатабылларын көрдөрдүлэр, билиһиннэрдилэр. Хас биирдии үлэһит үлэтигэр бэриниилээҕин уонна үгүс элбэх дьарыктааҕын көрдүбүт.
Ыам ыйын 27-28 күннэригэр Чурапчыга “Культурный код, как драйвер развития туризма” көһө сылдьар куурустар буоллулар. Манна култуура үлэһиттэрэ, креативнай индустрия бэрэстэбиитэллэрэ, туризымынан дьарыктанар урбаанньыттар кыттыыны ыллылар. Ол курдук тэрээһин кыттыылаахтара киин бибилэтиэкэбитигэр ыалдьыттаан аастылар. Бибилэтиэкэҕэ экскурсиялаатылар биир дойдулаахпыт Е.А.Борисов олоҕун, үлэтин уонна архыып бибилэтиэкэтин фондатын билистилэр. Борисов центр сэбиэдиссэйэ В.А.Платонова билиһиннэрдэ.
Ыам ыйын 28 күнүгэр ыччаттарга уонна улахан кылаас оҕолоругар Чурапчы историятыгар уонна кыраайы үөрэтиигэ сыһыаннаах «Тоҕус томтор ыллыгынан» квест-оонньуу ыытылынна. Ааҕааччыны кытта үлэлиир салаа бибилэтиэкэрэ В. Е.Маркова бу күрэххэ биир тэрийсээччинэн сырытта. Интэриэһинэй, киһини толкуйдатар боппуруостары ыйытан оонньотто. Ыччаттар Чурапчы тоҕус томтордоругар турар историческай эбийиэктэри кытта билсэн, таайбараҥнары таайдылар, араас сорудахтары толордулар.
Бу күн бибилэтиэкэ саалатыгар педагогическай үлэ бэтэрээнэ, СӨ үөрэҕириитин үтүөлээх үлэһитэ, РСФСР уонна ССРС норуотун үөрэҕириитин туйгуна, Чурапчы улууһун Бочуоттаах гражданина Мария Ивановна Чичигинарова 80- сааһынан “Сүрэхтэн саҕыллар махтал” биэчэрэ буолла.
Ыам ыйын 29 күнүгэр бүтүн арассыыйатааҕы агродиктант иккис төгүлүн ыытылынна. Аграрнай салааны тарҕатыыга уонна тыа хаһаайыстыбатын үөрэтиигэ, үлэҕэ уонна инвестицияҕа аныгы, технологическай хайысха быһыытынан үөскэтиигэ туһуламмыт федеральнай бырайыак буолар. Киин бибилэтиэкэ ааҕар саалатыгар толору дьон мустан агродиктаҥҥа кытынна.
Бу күн «Алмазэргиэнбанк» Чурапчытааҕы филиала тэриллибитэ 20 сылынан Дьокуускайтан коллегалара Е.А.Борисов архыып-бибилэтиэкэтигэр ыалдьыттаатылар.
