Чурапчыга «Сибэкки ыһыаҕа»
Бэс ыйын 4 күнүгэр Е.А.Борисов аатынан киин бибилэтиэкэ былассааккатыгар «Сибэкки ыһыаҕа» ыытылынна. Ол курдук бэйэ дьыалатынан дьарыктанар, оҕуруот аһын, сибэккини сөбүлээн үүннэрэр дьон кэлэн нэһилиэнньэҕэ арассаадаларын атыылаатылар. Чурапчы улууһун үрдүнэн күөх үүнээйини, оҕуруот аһын үүннэрии, олорор сирдэринэн ырааһырдыы үлэлэрэ аан бастаан 1972 сыллаахтан саҕаламмыт. Ол саҕана улууска дьахтар сэбиэтэ саҥа састаабынан талыллан үлэни саҕалаабыт, Председателинэн доруобуйа харыстабылын туйгуна Варвара Дмитриевна Васильева үлэлээбит. Оҕурсуну, помидору, моркуобу, луугу маассабайдык олордуу саҕаламмыт. Ол саҕана барыта саҥа буолан бу дьаһалларга оройуон кылаабынай агронома Василий Федотович Ермолаев нэһилиэнньэҕэ элбэх семинардары ыытан сүбэ-ама буолбута диэн Варвара Васильевна Макарова билиһиннэрдэ.
Бу күн бибилэтиэкэ үлэһиттэрэ кэлбит ыалдьыттарга араас хабааннаах куонкурустары тэрийдилэр. Ол курдук кумааҕыттан арааһынай сибэкки кырыйдылар, хоһоон да аахтылар, үүнээйилэр тустарынан викторина таайтардылар, сибэкки ойуулаах таҥастааах уонна араас сибэкки аатынан ааттаммыт кэрэ аҥардарга номинация туттардылар. Сибэккибит ыһыаҕын ылбаҕай ырыатынан киэргэттэ Сардаана Приходько. Оҕуруоччуттарга үүнээйини хайдах көрөргө-истэргэ сүбэлэри кэпсээтилэр.
Дьон-сэргэ тоҕуоруһа мустан үөрэн-көтөн, арассаада арааһын атыылаһан астынан тарҕастылар. Маннык тэрээһиннэргэ инникитин да кыттыыны ылар буолаарын диэн ыҥырабыт.
