«Ааҕааччы бенефиһа» буолла
Ыам ыйын 26 күнүгэр Е.А.Борисов аатынан киин бибилэтиэкэ саалатыгар бүтүн Россиятааҕы бибилэтиэкэ күнүн чэрчитинэн ыытыллар «Ааҕааччы бенефиһа», ону тэҥэ «Күннэр-дьыллар, бибилэтиэкэ историята» диэн историяны кэрэһэлиир быыстапка арыллыыта буолла. Бибилэтиэкэттэн сыл устата бэриниилээхтик, ситимин быспакка, элбэх кинигэни уларсыбыт, аахпыт, туһаммыт ону таһынан бэйэтин кылаатын киллэрэн кинигэни бэлэх уунан, көмө оҥорбут ааҕааччыларбытыгар анал ааттар туттарылыннылар. Тэрээһин саҕаланыытыгар бибилэтиэкэбит эдэр үлэһитэ Сардаана Дьячковская ылбаҕай ырыатынан кэлбит ыалдьыттары эҕэрдэлээтэ.
Быйылгы бириэмийэлэри ааспыт сыл бастыҥ ааҕааччылара туттардалыр. Ол курдук «Лучшие читатели читального зала» номинацияҕа тигистилэр Мария Павловна Сивцева уонна Мария Нюргустановна Макарова. Иккис анал аат «Лучший читающий коллектив» хаһаайыннарынан пенсионнай пуонда үлэһиттэрэ буоллулар. «Лучшие читающие супруги» анал ааты ыллылар Наталья Гаврильевна, Иннокентий Еремеевич уонна Надежда Поликарповна, Василий Петрович Захаровтар дьиэ кэргэттэрэ. «Лучший читатель общего отдела» анал ааты ыллылар Мария Дмитриевна Попова, Татьяна Васильевна Никитина.
Быйылгы сылга элбэх кинигэни бибилэтиэкэ пуондатыгар бэлэх ууммут ааҕааччыларбытыгар махтанан туран «Лучшие книжные дарители» анал ааты Семен Александрович Жендринскэйгэ уонна Айталина Савельевна Дьячковскаяҕа киин бибилэтиэкэ комплектования отделын сэбиэдиссэйэ Варвара Душкина туттарда. «Лучший читатель аудиокниги» быйылгыттан саҥа олохтоммут анал аат туттарыллынна 90 саастаах эрэллээх ааҕааччыбытыгар Светлана Георгиевна Дьячковскаяҕа. Бүгүҥҥү үөрүүлээх күнү хомоҕой хоһооннорунан киэргэттилэр Чурапчы бастыҥ хоһоон ааҕааччылара, ону тэҥэ Чурапчы литературнай түмсүү чилиэнэ, хоһоонньут Иннокентий Илларионович Алексеев.
Бибилэтиэкэ — дьон-сэргэ, оҕо-аймах, ыччат сөбүлээн түмсэр сирэ, кинигэ — олоххо сирдиир суолдьуппут, саҥаттан саҥаны арыйар, билиини-көрүүнү биэрэр истиҥ ыалдьыппыт.
