Кулун тутар 26 күнүгэр улуустааҕы Е.А.Борисов аатынан киин библиотекаҕа Чурапчытааҕы С.К.Макаров аатынан гимназия “Ааҕар дьиэ кэргэн – омук кэскилэ” бырайыага    үөрэнээччилэри уонна кинилэр төрөппүттэрин — ааҕар дьиэ кэргэттэри түмтэ. Тэрээһин саҕаланыытыгар  библиотеканы билиһиннэрэр экскурсияҕа   Атласова У.Н .  кэлбит ыалдьыттарга   киэн туттар биир дойдулаахпыт, бөдөҥ общественнай-политическай  диэйэтэл, Федерация Сэбиэтин сэнээтэрэ  Е.А.Борисов олоҕун, үлэтин, библиотекаҕа  анаан бэлэхтээбит баай  фондатын  туһунан  сиһилии  сырдатта.

“Ааҕар дьиэ кэргэн – омук кэскилэ”  бырайыак ааптардара гимназия саха тылын учууталлара Болдовская Ф.Н., Гоголева С.Н уонна библиотекарь Харлампьева Т.Н.  оҕону кыра эрдэҕиттэн төрөөбүт тылынан ааҕыыга угуйар, дьиэ кэргэнинэн  ааҕыыны көҕүлүүр сыаллаах бырайыагы үһүс сылын үлэлэтэллэр. Гимназия үөрэнээччилэрэ уонна төрөппүттэрэ  бырайыак  чэрчитинэн олус  интириэһинэй түһүмэхтэргэ кыттыбыттар. Ол курдук, «Уран  тыл долбуура» түһүмэххэ  дьиэтээҕи библиотекаларын, сөбүлүүр айымньыларын туһунан видеоролик устубуттар, «Көлүөнэттэн көлүөнэҕэ бэриллэр кинигэ” түһүмэххэ дьиэ кэргэн сэдэх кинигэтин сырдаппыттар, “Дьиэ кэргэн – сыанаҕа” түһүмэххэ аахпыт айымньыларын сыанаҕа  оонньоон көрдөрбүттэр. Ону сэргэ оҕолор төрөппүттэрин кытта  кылаас  таһынан сахалыы айымньылары ааҕан,  айымньы   ис хоһоонун арыйан   уруһуйдаан, тигэн, баайан араас оҥоһуктары оҥорбуттар, оонньуулары, викториналары толкуйдаабыттар. Быйыл бырайыак  “Айымньы айар үлэ кыһата” түһүмэҕин түмүгүн таһаарыы үөрүүлээх тугэнэ буолла.Бу  түһүмэххэ барыта 25 дьиэ кэргэн  айар үлэтинэн  кыттыбыт.Тэрээһин кыттыылаахтара  быыстапкаҕа турбут оҕолор оҥоһуктарын, ойулуктары,  кыыллар  туһунан айымньынан   оонньууну  көрөн астыннылар, сэргээтилэр.  Кыайыылаахтарга    анал ааттар  уонна “Айар” кинигэ кыһатын сертификаттара, бары кыттыбыт дьиэ кэргэттэргэ туоһу суруктар туттарылыннылар.

 Гимназия 10 кылааһын үөрэнээччилэрэ  Арина Сотникова, Коля Игнатьев нуучча улуу суруйааччыта А.С.Пушкин “Евгений Онегин” айымньытын  суруйааччы  Макаров.Г.И.- Дьуон Дьаҥылы сахалыы тылбааһыттан ааҕан иһитиннэрдилэр.

Тэрээһин  икис  чааһыгар “Оҕону ааҕыыга уһуйуу”  төгүрүк остуолга учууталлар, библиотека үлэһиттэрэ, төрөппүттэр санааларын үлэһиннилэр, туһалаах  сүбэлэри  иһиттилэр, бэйэлэрин көрүүлэрин,оҕону ааҕыыга уһуйар ньымаларын, уопуттарын кэпсээтилэр.  Кэскиллээх бырайыак ааптардарыгар, ааҕыыны көҕүлээччилэргэ өссө да айымньылаах үлэҕит  кэҥээн, сайдан  үгүс оҕону, төрөппүтү, дьиэ кэргэни  хабан, ааҕыы кэрэ эйгэтигэр сирдээн кинигэни  таптыырга, төрөөбүт  тылга уһуйа, угуйа турдун диэн баҕа санаабытын тиэрдэбит.