Сыл ахсын ыытыллар култуура үлэһиттэрин сүбэ мунньаҕа Чурапчы нэһилиэгин «Айылгы» НАДь-гэр алтынньы 19 күнүгэр бэрт сэргэхтик буолан ааста. Улууспут 17 нэһилиэгиттэн барыта 200-тэн тахса култуура эйгэтин үлэһиттэрэ кыттыыны ыллылар. 

Мунньах үөрүүлээх арыллыытыгар СӨ култуураҕа уонна духуобунай сайдыыга миниистирэ Афанасий Ноев быһа эфиргэ холбонон эҕэрдэ тыл эттэ.

Улуус дьаһалтатын үлэһитэ Алена Пермякова 2024 сылга үлэҕэ киириэхтээх Бахсытааҕы НАДь-тин, СӨ бастакы Ил Дархана  Егор Борисов  архыып-бибилэтиэкэтин дьиэтэ түмүктэнэн үлэҕэ киирилэрин уонна Хатылытааҕы көһөрүү түмэлэ тутулларын туһунан үөрүүлээх сонуннары иһитиннэрдэ.

Култуура салалтатын салайааччыта Петр Гуляев мунньах хаамыытын, кыттааччыларын билиһиннэрдэ. Чурапчы улууһун култууратын үлэтин-хамнаһын туһунан сырдатта. Үчүгэй көрдөрүүлээх үлэһиттэри, ансаамбыллары уонна эдэр исписэлиистэри чиэстээтэ.

Мунньах сүрүн ыалдьыттара Бурятия, Забайкалье култууратын үлэһиттэрэ быһа эфирга холобонон бэйэлэрин бырайыактарын, үлэлэрин туһунан кэпсээтилэр, дьон-сэргэ сэҥээриитин ыллылар.

Эбиэт кэннэ салааларынан арахсан анал семинардар буоллулар:

Бибилэтиэкэ үлэһиттэригэр аналлаах семинар «Айылгы» НАДь кыра саалатыгар буолла. 

Семинары СӨ НБ научнай-методическэй киинин сүрүн бибилэтиэкэрэ Лариса Никифорова 2032 сылга дылы Саха Өрөспүүбүлүкэтигэр библиотечнэй дьыла сайдыытын стратегиятын туһунан кэпсээтэ.

Нам улууһун бибилэтиэкэтин дириэктэрэ Майя Софронова, Горнай улууһун бибилэтиэкэтин дириэктэрэ Анна Иванова бэйэлэрин үлэлэрин, библэтиэкэлэрин туһунан кэпсээн уопут атастастылар. Атын улуус бибилэтиэкэтин үлэтин хаамыытын Чурапчылар олус сэҥээрдилэр, ыйытыы биэрэн сүбэ-ама ыллылар.

СӨ НБ медиа-киинин үлэһитэ Анна Прибылых бибилэтиэкэ сонуннарын хайдах сайтка сөпкө таһааран көрдөрүүнү элбэтэр туһунан сырдатта.

СӨ НБ  научнай-методическэй киинин сүрүн бибилэтиэкэрэ Анна Туварова оҕолору кытта хайдах тэҥҥэ үлэлиир, ханнык албастары туттан оҕону бэйэҕэ тардыы туһунан кэпсээтэ. Аныгы сыыппара үйэтигэр мобиографияны, ютубу уонна араас сыһыарыылары туһанан оҕолору кытта ыкса сибээстээхтик үлэлиэххэ наада диир.

СӨ НБ Саха сирин норуоттарын языковой цифровизацияларын уонна култуурунай нэһилиэстибэлэрин киинин библиографа Анисия Иевлева бибилэтиэкэ сайтыгар иһитиннэрэр матырыйаалы суруйуу туһунан кэпсээтэ. Сайтка саха тылынан суруйдахха элбэх дьону тардар диэн сүбэлээтэ. Бибилэтиэкэ эрэ туһунан буолбакка, сонуну барытын киллэрдэххэ элбэх киһи ааҕар диэн бэйэтин сүбэтин биэрдэ.

Семинары Дьокуускайдааҕы SMART бибилэтиэкэ сэбиэдиссэйэ Люция Бурцева социальнай медианы хайдах ыытыы, интириэһинэй контены оҥоруу уонна туспа бреднбуктаныы туһунан кэпсээн, сүбэ-ама биэрэн түмүктээтэ.

Чурапчы улууһун бибилэтиэкэтин үлэһиттэрэ бу семинартан олус элбэҕи билэн, саҥа уопут ылан тарҕастылар.