Дьоһун түгэн дьикти саастыын алтыһар…
Бэс ыйын 20 күнүгэр киин бибилэтиэкэҕэ биир дойдулаахпыт, РФ сенатора, биллиилээх государственнай, политическай деятель Егор Афанасьевич Борисов үөрэммит кылааһа Чурапчы орто оскуолатын 18 выпустара оскуоланы бүтэрбиттэрэ 55 сыллаах үбүлүөйүнэн Е.А.Борисов аатынан киин бибилэтиэкэ дьиэтигэр-уотугар иһирэх көрсүһүүгэ муһуннулар. Бу кэрэ бэлиэ даатаны көрсө бэчээттэнэн тахсыбыт «Дьоһун түгэн дьикти саастыын алтыһар 1971-2026сс.» альбом-кинигэ сүрэхтэниитэ ыытылынна. Бу альбому таһаарыыны салайбыт Е.А.Борисов, хомуйан оҥорбуттар бииргэ үөрэммиттэр В.М.Филиппова, С.И.Максимова, М.И.Яковлева, Н.В.Протопопова. Альбом олус тупсаҕай көстүүлээх, чаҕылхай хаартыскалардаах, хас да түһүмэхтэринэн араарыллан оҥоһуллубут. 18 выпустар оскуолатааҕы сылларын, учууталларын, оҕо, эдэр саастарын, үлэлэрин, олохторун, үйэ аҥаарыттан ордук кэмҥэ бииргэ алтыһан, доҕордоһон, өйөһөн-өйдөһөн сылдьалларын кэрэһэлиир, үйэтитэр өйдөбүнньүк буолбут. 18 выпуһунан оскуоланы бүтэрбиттэр бэйэлэрин дьарыктарын, айар талааннарын, бэчээккэ таһаарбыт кинигэлэрин быыстапкатын тэрийдилэр.
Бу тэрээһиҥҥэ Бырабыытылыстыба бэрэссэдээтэлин солбуйааччыта Г.М.Степанов кыттыыны ылла, үбүлүөйүнэн эҕэрдэлээн үрдүк наҕараадалары туттартаата. Е.А.Борисов үөрэппит учууталларыгар, бииргэ үөрэммит оҕолоругар махтанан бэйэтин киэҥ ис хоһоонноох ахтыытын оҥордо. Ону тэҥэ улуус дьаһалтатын баһылыга С.А.Саргыдаев, «Чурапчы нэһилиэгэ» тыа сирин түөлбэтин баһылыга В.Д.Сивцев, үөрэппит учууталлара, Чурапчы орто оскуолатыттан дириэктэри солбуйааччы Осипова А.Н. ыалдьыттаатылар, эҕэрдэлэрин тиэртилэр. Альбом таһаарыытыгар сүрүн үлэни толорооччу быһыытынан, Москваҕа олорор, үлэлиир Максимова С.И. үлэ хайдах ыытыллыбытын сиһилии сырдатта. Егор Афанасьевич, Прасковья Петровна Борисовтарынан сирэйдээн 18 выпустар архыып-бибилэтиэкэҕэ кыһыл көмүс солотуулаах алтан чороон бэлэхтээтилэр.
Үөрүүлээх тэрээһини, альбом-сүрэхтэниитин Борисов-киин сэбиэдиссэйэ В.А.Платонова иилээн-саҕалаан ыытта.
