Е.А.Борисов аатынан киин бибилэтиэкэ сонуннара

Оҕо библиотекатын иһинэн үлэлиир «Библиоканикулы» сайыҥҥы лааҕыр оҕолоругар, ону таһынан кэлбит ыалдьыттарга экскурсиялар ыытыллаллар. Егор Афанасьевич олоҕун, айар үлэтин уонна архыып бибилэтиэкэтин, фондатын кытта билсэллэр.

От ыйын 15 күнүгэр нуучча улуу суруйааччыта М.Ю.Лермонтовка өйдөбүнньүк уруок ыытылынна. М.Н.Захарова лааҕыр оҕолоругар Лермонтов оҕо эрдэҕинээҕи сааһыгар сылдьан уруһуйдуурун, хаарынан кыһан арааһынай фигуралары оҥорорун уонна элбэх кинигэ ааҕарын, хайдах хоһоон айан саҕалаабытын туһунан презентация нөҥүө сиһилии кэпсээтэ. “Баарыс» хоһоонун ис тутулун ырыттылар, кэпсэттилэр уонна бары дорҕоонноохтук нууччалыы уонна сахалыы аахтылар.

От ыйын 16 күнүгэр улахан дьоҥҥо хатайдааһын ньыматынан төлөпүөн хаҕын оҥоруутугар маастар кылаас ыытылынна. Онно туттуллар матырыйааллары нэмиэтин хайдах оҥорууну сиһилии билиһиннэрдэ «Умсулҕан» куруһуок  салайааччыта М.Н.Захарова. Маастар кылааска бэйэлэрэ хас биирдии кыттааччы тутан-хабан, оҥорон төлөпүөн хахтаннылар. Ону таһынан «Байдам» сурунаалтан «Көмүс тарбах» диэн илиинэн оҥорон таһаарар рубриканы быыстапкалаан билиһиннэрдэ.

От ыйын 23 күнүгэр «Эмтээх от»  куруһуок түмсүүтэ быйылгы от хомуйуутун туһунан кэпсэттилэр, бэйэ-бэйэлэригэр сүбэ-ама биэрдилэр. Ол курдук З.Н.Сивцева – “Тар — өбүгэ аһа», Л.А.Ермолаева – «Сөпкө аһааһын туһунан» уонна В.Е.Маркова – отунан оҥоһуллар маас, настойка, чэй кистэлэҥнэрин кэпсээтилэр. Салҕыы от хомуйуутугар үлэлэрин торумнастылар, аныгыскы күһүҥҥү көрсүһүүлэригэр, балаҕан ыйыгар СВО кыттыылаахтарыгар ыытар эмтээх отторун хомуйалларын кэпсэттилэр. Бу куруһуок 2022 сыллаахтан бибилэтиэкэ иһинэн таһаарыылаахтык үлэлии сылдьар.