Е.А.Борисов аатынан киин бибилэтиэкэ сонуннара
Ааспыт нэдиэлэҕэ Бүлүү улууһун музейын үлэһиттэрэ ыалдьыттаатылар. Бибилэтиэкэ пуондатын кытта билистилэр, ону тэҥэ Е.А.Борисов олоҕун, айар үлэтин туһунан иһиттилэр, экскурсиялаатылар.
Бэс ыйын 8 күнүттэн киин бибилэтиэкэ «Үүн-сайын» медиалабораториятыгар сылын аайы оҕо бибилэтиэкэтэ тэрийэр «Библиоканикулы» күнүскү лааҕыра саҕаланна.
Бу күн социальнай управления тэрийиитинэн Дьокуускай куораттан опека үлэһиттэрэ семинар ыыттылар.
Бэс ыйын 9 күнүгэр дьиэ кэргэн лааҕырыгар сынньанар оҕолорго бибилэтиэкэҕэ экскурсия тэрилиннэ уонна профориентационнай библиотечнай уруок ыытылынна.
ЕГЭ, ОГЭ туттарааччылар сыллата бибилэтиэкэҕэ кэлэн консультацияланаллар.
Улуустааҕы киин бибилэтиэкэҕэ «Умсулҕан» бараан түүтүн хатайдааһын ньыматынан араас таҥас оҥоһуутугар куруһуок үлэтин түмүктээтэ. Куруһуок кыттыылаахтара олбох, үтүлүк, кыра сумкалары, бэргэһэ араас көрүҥүн оҥорон саҥаны билэн, натуральнай, сылаас таҥас хатайдаатылар. Сыл устата 30 тахса баҕалаах киһи сырытта. Дьон биһирээтэ, инникитин маннык дьарык наада диэн баҕа санааларын эттилэр. Куруһуогу иилээн-саҕалаан ыытта ааҕааччыны кытта үлэлиир салаа бибилэтиэкэрэ М.Н.Захарова.
Бэс ыйын 11 күнүгэр Россия күнүн чэрчитинэн лааҕыр оҕолоругар «День славянской письменности и культуры» диэн славян норуотун суругун-бичигин сырдатааччылар убайдыы бырааттыы Кирилл уонна Мефодий тустарынан информационнай уруок ыытылынна. Манна оҕолор глаголица уонна кириллица азбукатын кытта билистилэр, суруйан, ааҕан көрдүлэр, заглавнай буукубалары кырааскалаатылар. Уруогу ааҕааччыны кытта үлэлиир салаа бибилэтиэкэрэ Л.Т.Никитина ыытта.
Россия күнүн көрсө үөрүүлээх түгэн буолла. Россия сенатора, биир дойдулаахпыт Егор Афанасьевич Борисов көҕүлээһининэн улуус киин бибилэтиэкэтигэр Россия араас регионнарыттан кинигэ пуондатын хаҥатыыга дьоһун бэлэх оҥоһулунна. Ол курдук араас регионнар бэйэлэрин дойдуларын сырдатар, историяларын кэпсиир, баай ис хоһоонноох, кыраһыабай оҥоһуулаах, үрдүк хаачыстыбалаах полиграфиялаах 200-чэкэ улахан, интэриэһинэй кинигэлэрэ бибилэтиэкэҕэ киирдилэр. Бу кинигэлэри Россия күнүн чэрчитинэн нэһилиэнньэҕэ билиһиннэрэр сыаллаах тэнитиллибит, киэҥ ис хоһоонноох кинигэ быыстапката туруорулунна. Күндү биир дойдулаахтарбыт Е.А.Борисов аатынан киин бибилэтиэкэҕэ кэлиҥ, көрүҥ, сэргээҥ!
