Дорҕоон буоламмын, дуораһыйан иһэн, уостан сүтүмүүм…
Бэс ыйын 15 күнүгэр Е.А.Борисов аатынан киин бибилэтиэкэҕэ биир дойдулаахпыт Одьулуун нэһилиэгиттэн төрүттээх, бэйиэт, тылбаасчыт Дмитрий Герасимович Дыдаев төрөөбүтэ 90 сылыгар анаан бэчээттэнэн тахсыбыт «Дорҕоон буоламмын, дуораһыйан иһэн, уостан сүтүмүүм…» икки туомтан турар кинигэ биһирэмэ буолла. Д.Г.Дыдаев айар үлэтин уонна олоҕун сырдатар икки туомнаах таһаарыы маҥнайгы чааһыгар суруйааччы араас сылларга суруйбут хоһоонноро, поэмалара, тылбаастара уонна ыстатыйалара түөрт түһүмэххэ араарыллан киирбиттэр. Кинигэ иккис чааһыгар суруйааччы кэргэнигэр Т.П.Слепцоваҕа суруктара, бэлиэтээһиннэр, айымньылар ырытыылара, ахтыылар, ону таһынан анабыл суруктар уонна хаартыскалар тиһиллэн киирбиттэр. Кинигэ 2025 сыллаахха Саха Өрөспүүбүлүкэтин Национальнай бибилэтиэкэтэ, дириэктэр С.В.Максимова быһачччы өйөбүлүнэн, наарданан, таҥыллан, бэчээккэ бэлэмнэнэн «Дани Алмас» кинигэ кыһатыгар 2 туомунан бэчээттэнэн таҕыста. Кинигэни хомуйан оҥордулар: Н.И.Харлампьева, П.П.Горохов уонна А.И.Поисеева.
Бу тэрээһиҥҥэ биир дойдулаахпыт, биллиилээх общественнай, государственнай деятель, кинигэни көҕүлээн таһаарааччы А.И.Поисеева, Национальнай бибилэтиэкэ дириэктэрэ С.В.Максимова, ону тэҥэ Москва куораттан биир дойдулаахпыт С.И.Максимова кыттыыны ыллылар. Кинигэҕэ ыытыллыбыт үлэни, Д.Дыдаев олоҕун, айар үлэтин сиһилии сырдатан мустубут дьоҥҥо кэпсээтилэр. Одьулуун нэһилиэгиттэн бэйиэт биир дойдулаахтара актыыбынай кыттыыны ыллылар.
Чурапчы улууһун депутаттарын сэбиэтин бэрэссэдээтэлэ Я.П.Оконешников, улуус баһылыгын социальнай боппуруостарга солбуйааччы М.Ф.Кронникова, култуура управлениятын начальнига П.Е.Гуляев, Одьулуун нэһилиэгин тыа сирин түөлбэтин баһылыга Л.В.Ефремова, Дмитрий Дыдаев хаан-уруу аймахтара Дыдаевтар, бэйиэт айар үлэтин сэҥээрээччилэр, биир дойдулаахтара эҕэрдэ тылларын тиэртилэр. Кинигэ биһирэмин ыытта Борисов-центр салайааччыта В.А.Платонова.
