Ахсынньы 28 күнүгэр Чурапчыга Егор Афанасьевич Борисов ыалдьыттыы кэллэ.

Аан бастаан, саҥа тутулла турар бибилэтиэкэ-архыып дьиэтин көрдө, сайдар торумун кытта билистэ.

Ол кэннэ «Егор Борисов» диэн «Жизнь замечательных людей» сериянан тахсыбыт  кинигэ сүрэхтэниитигэр кыттыыны ылла. Бу кинигэни суруналыыс Алексей Березовский суруйан саҕалаабыт, суруйааччы Владимир Федоров түмүктээбит.

Кинигэ сүрэхтэниитин мадараатарынан Михаил Дмитриевич Гуляев үлэлээтэ. Кинигэ туһунан Чурапчы киин бибилэтиэкэтин дириэктэрэ Вера Апполлоновна Платонова дьоҥҥо-сэргэҕэ билиһиннэрдэ.

Кинигэ суруллуутун туһунан Владимир Федоров видео-ситим нөҥүө кэпсээтэ.

Үөрүүлээх түгэнинэн Егор Борисовы АБ Сенатора Сахамин Афанасьев, СӨ Ил Түмэн бэрэссэдээтэлэ Алексей Еремеев, Ил Түмэн бэрэссэдээтэлин бастакы солбуйааччыта Александр Жирков, СӨ Бырабыыталыстыбатын бэрэссэдээтэлин солбуйааччы Георгий Степанов, уонна да атын бииргэ алтыспыт, үлэлээбит дьоно кэлэн эҕэрдэлээн, үөрүүлэрин үллэстэн тарҕастылар.

Чурапчы улууһун баһылыга Степан Саргыдаев киэн туттарын бэлиэтээн туран, улууһун дьонун-сэргэтин аатыттан Егор Афанасьевич мэтириэтин туттарда.

Тэрээһин түмүгэр Егор Борисов кинигэлэригэр илии баттаан туран, дьонугар-сэргэтигэр бэлэх уунна.