Тэбэнэттэр кинигэ биһирэмэ

Олунньу 25 күнүгэр Е.А.Борисов аатынан киин бибилэтиэкэҕэ Чурапчы айар түмсүү чилиэнэ, хоһоонньут, үлэ бэтэрээнэ Иннокентий Илларионович Алексеев «Тэбэнэттэр» кинигэтин сүрэхтэниитэ буолла.

Иннокентий Илларионович оҕолорго анаабыт хомоҕой хоһооннорун төрдүс кинигэтэ. Кини олдьот оҕолорго анаабыт хоһоонноругар саха төрүт-уус майгытыттан, итэҕэлиттэн силис-мутук тардар буоланнар аахпыты эрэ астыннараллар, көрбүтү эрэ кэрэхсэтэллэр, утаппыттыы умсугуталлар. Манна сыдьаайар сырдыкка дьулуһуу, кэрэхсэнэр кэрэҕэ тардыһыы диэн кинигэ аннотациятыгар суруллубут.

Кинигэ 2025 сыллаахха СӨ «Сахабэчээт» ГАТ Чурапчытааҕы  «Саҥа олох» эрэдээксийэтигэр 100 экземплярынан бэчээттэнэн тахсыбыт. Бу кинигэҕэ уопсайа 41 арааһынай ис хоһоонноох, уһуйаан алын кылаас оҕолоругар сөптөөх хоһооннор таҥыллан киирбиттэр. Кинигэ таһа олус тупсаҕай көстүүлээх, дьэрэкээн оҕолорго олус барсар. Ааптар кинигэ уруһуйдарын бэйэтэ уруһуйдаан киэргэппит. Кинигэ 4 түһүмэхтэн турар, ол курдук : «Ойор-тэбэр оҕо саас», «Билиэххэ-көрүөххэ үөрэниэххэ», «Айылҕалыын алтыһабыт», «Мин доҕотторум кыылларым».

Кинигэ сүрэхтэниитигэр ыалдьыт буолан кэлэннэр П.И.Борисова аатынан «Улыбка» оҕо уһуйаанын бэлэмнэнии «Лингвапарк бөлөх»иитиллээччилэрэ, ону тэҥэ И.М.Павлов аатынан Чурапчы орто оскуолатын 4 кылааһын оҕолоро Иннокентий Илларионович суруйбут хоһооннорун ааҕан тэрээһини киэргэттилэр. Тэрээһиҥҥэ Чурапчытааҕы Физкультура уонна спорт институтун профсойууһун бэрэссэдээтэлэ В.В.Лукин, Чурапчы улууһун профсойуустарын тэрилтэлэрин координационнай сэбиэтин бэрэссэдээтэлэ Давыдов Е.И, Улуустааҕы үөрэх управлениятыттан Л.М.Федотова, «Чурапчы» айар литературнай түмсүү, чугас аймах-билэ дьоно эҕэрдэлэрин, истиҥ тылларын тириэртилэр.