Олунньу 16 күнүгэр Чурапчы киин бибилэтиэкэтигэр сахалыы дьыктаан буолан ааста. Дьыктаан «Төрөөбүт тыл уонна сурук-бичик күнүн» чэрчитинэн ыытыллынна. Саха Сирин бастакы Президена М.Е. Николаев 1996 сыл олунньу 9 күнүнээҕи 1294 №-дээх «Төрөөбүт тыл уонна сурук-бичик күнүн биллэрии туһунан» Ыйааҕыгар олоҕуран, С.А. Новгородов төрөөбүт күнэ — олунньу 13 күнэ — Төрөөбүт тыл уонна сурук-бичик күнүнэн биллэриллибитэ.  

Бу күн олохтонуута Саха Сирин төрүт олохтоохторун төрөөбүт тылларын сайыннарыыга, бастакы саха суругун-бичигин олохтообут саха лингвист-учуонайа, бастакы саха үөрэҕин кинигэлэрин таһаарааччы Семен Андреевич Новгородов сырдык кэриэһин үйэтитэр, аатын ытыктатар соруктаах.

Төрөөбүт тылга, сурукка-бичиккэ аналлаах декада чэрчитинэн сахалыы таба суруйуу үөрүйэҕин олохсутар, иҥэрэр сыаллаах «Сахалыы дьыктаан» аахсыйа Дьыктааны суруйууну Хотугулуу-Илиҥҥи норуоттары тылларын, култуураларын үөрэтэр үнүстүүт саха тылын хаапыдырата уонна Национальнай библиотека тэийиилэринэн 2014 сыллаахтан ыытыллар.

Быйыл В.С. Федоров-Сэмээр Баһылай «Чыычаахтар» айымныытыттан суруйуу буолла. Араас эйгэҕэ үлэлиир дьон-сэргэ тоҕуоруһа мустан суруйдулар. Дьыктааны бибилэтиэкэ үлэһитэ Римма Петрова аахта.

Дьыктааны суруйуу түмүгүнэн:

«Бастыҥтан бастыҥ суруксут» аатын Сардаана Дьячковская ылла;

«Бастыҥ суруксут» Варвара Душкина;

«Үчүгэй суруксут» Егор Винокуров.

Кыттааччылар бары туоһу, махтал сурук тутан тарҕастылар.

Чурапчы нэһилиэгэр «Төрөөбүт тыл, сурук-бичик күнүн» чэрчитинэн ыытыллыбыт өрөспүүбүлүкэтээҕи сахалыы дьыктаан аахсыйаҕа кыттан, сахалыы таба суруйууга холоммут, олоххо мэлдьи актыыбынай көрүүлээх дьоммутугар истиҥ махталбытын тиэрдэбит.