Бүгүн, кулун тутар ый 19 күнүгэр улуустааҕы библиотекаҕа көҥүл тустууга  сахалартан бастакы Олимпийскай чемпион Роман Дмитриев төрөөбүтэ 75 сылыгар анаммыт «Саха тустуутун номоҕо — Роман Дмитриев» диэн бэсиэдэ-уруок ыыттылынна.

Аатырбыт бөҕөс спортка анаммыт олоҕун, үлэтин туһунан спорту көҕүлээччи, Чурапчытааҕы физкультура уонна спорт институн преподавателэ Дьяконов Виктор Семенович Чурапчы гимназиятын 7 кылааһын үөрэнээччилэригэр кэпсээтэ. Оҕолор 1972с. ыытыллыбыт Мюнхеннааҕы Олимпиадаҕа Роман Дмитриев өрөгөйдөөх кыайыытын туһунан документальнай сюжеты сэргээн көрдүлэр. Чулуу тустуук  туһунан кэпсиир кинигэлэри билистилэр.

Уруок түмүгэр урукку көлүөнэ оҕолоро, уолаттар сөбүлээн оонньуур кумааҕы тустууктарынан оонньооннор, күрэхтэһэн үөрдүлэр-көттүлэр.