Сэтинньи 23 күнүгэр Чурапчы киин бибилэтиэкэтигэр ССРС уонна Саха Өрөспүүбүлүкэтин култууратын туйгуна, Өрөспүүбүлүкэ култууратын үлэһиттэрин алтыс сийиэһин дэлэгээтэ, уон биирис пятилетка кыайыылааҕа, Хатылы нэһилиэгин, Чурапчы улууһун бочуоттаах олохтооҕо, норуотун маастара, Саха Өрөспүүбүлүкэтин норуотун уус-уран уонна илиинэн уһаныы оҥоһуктарын маастара, Чурапчы улууһун култууратын бэтэрээнэ, «Чурапчы улууһун сайдыытыгар кылаатын иһин» III истиэпэннээх, «Саха Өрөспүүбүлүкэтин норуоттарын култуурунай айымньытын сайдыытыгар кылаатын иһин», «Хатылы нэһилиэгин сайдыытыгар кылаатын иһин», «Гражданскай килбиэн бэлиэлэр» хаһаайына, Хатылы нэһилиэгин бибилэтиэкэтин сэбиэдиссэйинэн 40-тэн тахса сыл үлэлээбит, биһиги бэтэрээммит Мария Петровна Иустинова суруйбут «Олоҕум ыллыга» кинигэтин сүрэхтэниитэ буолан ааста.

«Олоҕум ыллыга» кинигэ алта түһүмэхтэн турар:1) «Олоҕум ыллыга» түһүмэххэ кимтэн кииннээҕэ, хантан хааннааҕа, оҕо сааһын сыллара киирэллэр.2) «Устудьуон сылларым — олоҕум биир түһүмэҕэ» түһүмэх сэттэ ахтыыттан турар.3) «Үлэ оргуйар үөһүгэр» түһүмэх сүүрбэ ахтыыттан турар.4) «Кинигэлэрим тула санаалар» түһүмэх барыта биэс ахтыыттан турар.5) «Кэпсиибин сүрэҕим этэринэн» түһүмэх 11 ахтыыттан турар.6) «Санаабын сааһылаан, хоһоон түөлбэтигэр» түһүмэх 32 истиҥник саныыр үбүлүөйдээх үөлээннээхтэригэр, атастарыгар-доҕотторугар, аймах-билэ дьонугар анабыл хоһоонноро киирдилэр.

 Чурапчы култууратын салалтатын начальнига Петр Егорович Гуляев, Хатылы нэһилиэгин хоту көһөрүллүү түмэлин салайааччыта, СӨ култууратын туйгуна Марфа Владимировна Чичигинарова, Хатылы нэһилиэгин «Баҕа санаа» үһүс көлүөнэ түмсүүтүн чилиэнэ Варвара Дмитриевна Федорова, Хатылы нэһилиэгиттэн төрүттээх Саха сиринээҕи архыып научнай үлэһитэ Мария Петровна Софронова, СӨ норуотун хаһаайыстыбатын үтүөлээх үлэһитэ, биир дойдулааҕа, аймаҕа Ульяна Николаевна Атласова, Улуустааҕы кииннэммит бибилэтиэкэ ситимин методиһа, СӨ култууратын туйгуна Дария Пантелеймоновна Егасова, Арассыыйа уопсай иитиитин уонна үөрэхтээһинин бочуоттаах үлэһитэ, С.А. Новгородов аатынан оскуола Анна Егоровна Гордеева аатынан «Дархан кыһата» түмэл салайааччыта Татьяна Кононовна Матвеева, СӨ култууратын туйгуна, «Саҥа олох» кылаабынай эрэдээктэрэ Анна Николаевна Захарова, СӨ култууратын туйгуна, култуура бэтэрээнэ Татьяна Павловна Ефремова, Анастасия Егоровна Аргунова, Анна Романовна Аржакова, Христина Петровна Федулова Мария Петровнаны кинигэтэ сүрэхтэммитинэн эҕэрдэлээтилэр, алгыс-үтүө тылларын эттилэр, устуоруйаны сырдатарын иһин махтаннылар.

Бииргэ төрөөбүттэрин ааттарыттан Ульяна Петровна Никифорова, Василий Петрович, Мария Константиновна Чичигинаровтар үтүө ахтыыларын, махтал тылларын уонна эҕэрдэ ырыаларын бэлэхтээтилэр.

Дьиэ кэргэнин аатыттан кыыһа Туйаара Николаевна Харлампьева, кэргэнэ Николай Иванович Иустинов ийэлэрэ кэлэр кэскиллэригэр баай кинигэ нэҺилиэстибэтин суруйбутугар махтаннылар, үтүө-мааны тыллары эттилэр.

Тэрээһин бүтүүтэ Мария Петровна бэйэтин санаатын, кинигэ хайдах суруллубутн туһунан ахтан-санаан кэпсээтэ, кэлбит ыалдьыттарга махтанна.