Хас сылын аайы алтынньы 15 күнүгэр «Үрүҥ торуоска» Аан дойдутааҕы күнэ бэлиэтэнэр.
«Үрүҥ торуоска» күнүн сүрүн сыалынан харахтара көрбөт уонна мөлтөхтүк көрөр дьоҥҥо уопсастыба болҕомтотун тардыы, тулуурдаах сыһыаны олохтооһун, инникигэ эрэли үөскэтии буолар.Сэтинньи 8 күнүгэр
акция күнүгэр аналлаах киин библиотекаҕа «Мин көрөбүн сүрэхпинэн» диэн истиҥ көрсүһүү буолан ааста.
Чурапчы улууһун Физическэй култуураҕа уонна спортка салаатыгар адаптивнай хайысха салайааччыта И.К.Матвеев, олохтоох дьаһалта доруобуйаларыгар хааччахтаах дьону уонна бэтэрээннэри кытта үлэлиир исписэлииһэ М.П. Матвеева, социальнай управление специалиһа Н.К.Дьячковская, улуустааҕы көрбөттөр уопсастыбаларын председателя В.И.Пономарев, көмөлөһөөччү Т.А. Васильева баҕа санааларын тиэртилэр.
Остуол тула олорон
араас сылларга ыытыллыбыт тэрээһиннэргэ, куруутун көхтөөхтүк кыттан кэлбит дьоммут ситиһиилэрин, кэрэ кэмнэри санаһан аастылар. Көрсүһүүнү библиотекарь Р.Петрова иилээн-саҕалаан ыытта.
М.П.Баягантаева доруобуйаҕа туһалаах сүбэлэрин сэргээн, эти-хааны чэбдигирдэр хамсаныылары оҥордулар.
Остуол оонньууларын С.А.Новгородов аатынан орто оскуола физкультура учууталлара Д.К Седалищев, Е.Е.Куприянов оонньоттулар. Кыайыылаахтар быһаарыллан, бириистэри туттулар.

«Ырыа кырдала» ырыа куонкуруһугар истиҥ ырыалар ылланнылар,
дууһаны таарыйар бэйэ айбыт хомоҕой хоһооннор иһилиннилэр.
Кыайыылаахтарга анал ааттар иҥэрилиннилэр: Кылаан кыайыылаах — Парасковья Дмитриевна Дьячковская (Дириҥ),
«Ылбаҕай ырыа» — Клара Кирилловна Тоскина (Дириҥ),
«Ыллам ырыаһыт» — Мария Григорьевна Захарова (Чурапчы),
«Иэйиилээх ырыаһыт» — Дмитрий Михайлович Неустроев (Чурапчы),
«Истээччи биһирэбилэ» — Мария Ивановна Слепцова (Чурапчы).

Көрсүһүү түмүгэр Сылантан Афанасий Иннокентьевич, Иван Иннокентьевич Говоровтар муҥхаларыттан көмүс хатырыгынан күндүлээтилэр.
Спонсордарынан «Эгэлгэ» маҕаһыын хаһаайына Эдуард Адамович Таныков, урбаанньыт Андрей Иосафович Коркин буоллулар.


Кэлбит ыалдьыттар тэрийээччилэргэ, библиотека коллективыгар махтал тылларын эттилэр. Бу курдук көхтөөх тэрээһиннэр ыытылла туралларыгар баҕа санааларын тиэрдэн, махтанан тарҕастылар.

Римма Петрова