Тохсунньу 19 күнүгэр Кириһиэнньэ диэн Христос кириэстэммит күнүн христианскай Таҥара итэҕэллээхтэрэ үөрэн-көтөн туран бэлиэтииллэр.

Бу бырааһынньык Иисус Христос Иордан өрүскэ киирэн Иоанн Предтеча көмөтүнэн сүрэхтэнии сиэрин-майгытын ааспытын туһунан кэрэһэлиир. Кириһиэнньэ иннинэ туох баар айыыгын-хараҕын, дьоҥҥо туох куһаҕаны оҥорбуккун барытын санаан туран, алҕаһаабыккын өйдөөн, сыыспыккын ис сүрэхтэн истиҥник билинэн, ол сүгэһэргиттэн босхолонуохтааххын. Иоанн Предтеча саҥа ыраас сырдык олоххо үктэниэн баҕалаах дьону айыыларын-хараларын билиммиттэрин кэннэ ууга үстэ чомполоон ылара. Онтон сиэттэрэн Кириһиэнньэ күн буруолаабытынан ойбоҥҥо киирэн үстэ умсан ылар үгэс олохтоммута.

Иисус Христоһу итэҕэйэр дьон кэнниттэн батыһан киирэн өрүскэ сүрэхтэнэр кэмнэригэр халлаан сиигэ арыллан, Сибэтиэй Троица: Таҥара Аҕата, Уола уонна Сибэтиэй Тыын көстүбүт. Үрүҥ холууп өрө көтөн тахсан: «Тапталлаах уолбун алгыыбын», — диэн саҥа иһиллибит. Ол иһин Кириһиэнньэ иккис аата — Таҥара илэ көстүүтэ.

Тохсунньу 18-20 күннэригэр Кириһиэнньэ сөтүөтэ буолар. Ойбоҥҥо киирэн сөтүөлээн тахсыбыт киһи тута айыытыттан-харатыттан босхолонор диэн буолбатах, бастатан туран, куһаҕаны оҥорбуккун билиниэххин, инникитин ону хатылаабат курдук дьаһаныаххын наада диэн этэллэр Таҥара үлэһиттэрэ.