Киин библиотекаҕа кинигэ быыстапкалара турдулар.
Чурапчытааҕы киин библиотекаҕа «Өй санаа кэрэ эйгэтигэр» диэн Иннокентий Семенович Окоемов 90 сылыгар аналлаах быыстапка турда.
Окоемов Иннокентий Семенович — РСФСР норуотун үөрэҕириитин туйгуна, ССРС Суруналыыһын туйгуна, ССРС бэчээтин туйгуна, Саха АССР оскуолаларын үтүөлээх учуутала, сэрии уонна педагогическай бэтэрээнэ, Чурапчы улууһун бочуоттаах олохтооҕо, историк-учуутал, хоһоонньут.
Н.С.Соловьев туһунан «Чуораан чугдаардаах дьылҕа» диэн бастакы очеркатын кинигэтэ 1998 сыллаахха тахсыбыта. «Саҥа олох» хаһыат 70 сылын туолуутугар «Чурапчы хаһыата» диэн очерковай кинигэтэ 2001 сыллаахха бэчээттэммитэ. Ону тэҥэ 20-тэн тахса кинигэни эрэдээксийэлээбитэ. Хоһоонноро олохтоох Саҥа олох хаһыакка тахсыбыттара.
Ону таһынан абонемент хоһугар «Творческое наследие» диэн үбүлүөйдээх омук уонна нучча суруйааччыларыгар быыстапка турда. Онно бааллар Н.Г. Чернышевскай, Г.Р.Державин, А.Д. Дементьев, В.Г. Короленко, Ирвинг Стоун, Эмили Бронте, Джеймс Олдридж, Рэймонд Чандлер.
Киирэҥҥит сэргээн, ааҕыҥ, кинигэлэрин уларсын.