«Хомоҕой хоһоон түһүлгэтэ» күрэх
Балаҕан ыйын 12 күнүгэр Е.А. Борисов аатынан улуустааҕы киин библиотека Чурапчы күнүгэр үтүө үгэс буолбут «Хомоҕой хоһоон түһүлгэтэ» уус-уран хоһоон ааҕыытын күрэҕин 11 төгүлүн тэрийэн ыытта. Чурапчыбыт биир кэрэ миэстэтигэр Барахсаанап пааркатыгар, хоһоону сэҥээрээччилэр, айар куттаахтар тоҕуоруһа муһуннулар. Аан маҥнайгытын “Хомоҕой хоһоон түһүлгэтэ” күрэх 2015 сыллаахха Литература сылын көрсө уонна биир дойдулаахпыт Семен Романович Данилов төрөөбүтэ 80 сылыгар ананан тэриллибитэ. Бу сыллар тухары “Чурапчы нэһилиэгэ” тыа сирин түөлбэтэ бу күрэҕи өйөөн, тэрийсэн кэллэ.
Тэрээһин саҕаланыытыгар Чурапчы нэһилиэгин баһылыгын солбуйааччы Уйгулан Тулааһынап, култуура управлениятын начаалынньыгын солбуйааччы Сусанна Дьячковская кэлбит дьону-сэргэни, кыттааччылары эҕэрдэлээтилэр. Кэскилээнэ Сивцева ылбаҕай ырыатын бэлэхтээтэ. Быйылгы күрэх Арассыыйаҕа норуоттар сомоҕолоһууларын сылыгар туһуланан икки хайысханан ыытылынна. Кыттааччылар “Төрөөбүт дойдум – Чурапчы” бастакы хайысхаҕа Чурапчы туһунан, иккис хайысхаҕа “Норуоттар доҕордоһуулара үйэлэргэ” Арассыыйа норуоттарын айымньыларын сахалыы тылбаас хоһооннорун аахтылар. Быйылгы күрэххэ элбэх эдэр ыччат, оҕолор кэлэн кыттыбыттара кэрэхсэбиллээх. Бэлиэтээн эттэххэ, бу күрэххэ Чурапчытааҕы аграрнай-техническэй лицей устудьуоннара Пономарева Розалия Степановна салайааччылаах бөлөҕүнэн кэлэн сылын аайы ситиһиилээхтик кытталлар.
Кэлбит ыалдьыттар, тэрээһин кыттыылаахтара поэзия долгунугар уйдаран төрөөбүт дойдуга таптал, айылҕа, олох, доҕордоһуу туһунан бииртэн биир ураты истиҥ, иэйиилээх хоһооннору истэн дуоһуйдулар. Дьүүллүүр сүбэҕэ Саха Өрөспүүбүлүкэтин култууратын туйгуна, “Ай” студия салайааччыта Айылгы Муосчут кыыһа Пинигина, Саха Өрөспүүбүлүкэтин үөрэҕириитин туйгуна, РФ үөрэҕириитин бочуоттаах үлэһитэ, Учууталлар учууталлара, С.А.Новгородов аатынан орто оскуола саха тылын, литэрэтиирэтин учуутала Евдокия Федоровна Феоктистова, Саха Өрөспүүбүлүкэтин култууратын туйгуна, пуонданы кэмпилиэктиир отдел сэбиэдиссэйэ Варвара Ивановна Душкина үлэлээтилэр. Дьүүллүүр сүбэ кыттааччылары тыллара-өстөрө чуолкайын, уустаан-ураннаан, ис хоhоонун арыйан ааҕалларын, көрөөччүгэ итэҕэтиилээх тиэрдиилэрин сыаналаата, түмүккэ хайысхаларынан кыаҋыылаахтары ааттаталаата. Ол курдук, бөлөҕүнэн ааҕыыга 1 миэстэни Чурапчытааҕы аграрнай-техническэй колледж устудьуоннара, 2 миэстэни — С.Новгородов аатынан орто оскуола 4 “г” кылааһын үөрэнээччилэрэ, 3 миэстэни — С.Новгородов аатынан орто оскуола 8 “а” кылааһын үөрэнээччилэрэ ыллылар. “Төрөөбүт мин дойдум — Чурапчы” хайысхаҕа 1 миэстэ — Степанида Попова, 2 миэстэ — Николанна Бушуева – Арчылаана, 3 миэстэ — Алексей Слепцов уонна “Норуоттар доҕордоһуулара үйэлэргэ” хайысхаҕа 1 миэстэ — Анна Седалищева, 2 миэстэ — Барабанская Констанина, 3 миэстэ — Артахинова Дайаана буоллулар. Култуура управлениятын анал бирииһин дьүүллүүр сүбэ кэскиллээх ааҕааччыга Заболоцкая Кэрэлгэ туттарда.
Тэрээһин кыттыылаахтара чаҕылхай күннээх, күһүҥҥү кэрэ көстүүгэ фотозонаҕа хаартыскаҕа түһэн, ирэ-хоро кэпсэтэн, алтыһан, библиотека үлэһиттэрэ бэлэмнээбит оонньууларыгар кыттан үөрэн-көтөн, астынан тарҕастылар. «Хомоҕой хоһоон түһүлгэтэ» күрэх кыайыылаахтарын итиитик-истиҥник эҕэрдэлиибит уонна бары кыттааччыларга барҕа махталбытын тиэрдэбит, эһиил хоһоон түһүлгэтигэр көрсүөххэ дылы!
