Е.А. Борисов аатынан киин бибилэтиэкэҕэ ыытыллыбыт бэлиэ дьаһаллар
Муус устар 19 күнүгэр геноцид сиэртибэлэрин кэриэстиир күн. Маннык алдьархай хатыламматын туһунан нэһилиэнньэҕэ киин бибилэтиэкэ үлэһиттэрэ сырдатыы үлэтин ыыттылар. Бу күн суолтатын кэпсээн дьоҥҥо паамяткалары туттартаатылар.
Муус устар 23 күнүгэр «Ааҕар саха сайдам ыала» дьиэ кэргэн олимпиадата онлайн былаһаакканан буолла. Уопсайа Чурапчы улууһун үрдүнэн 596 дьиэ кэргэн кыттыыны ылбыта биллэр.
Муус устар 24 күнүгэр сахабыт сиригэр култуура сылынан улуустааҕы сылын аайы ыытыллар “Культурологическай ааҕыы-2026” научнай-практическай конференция буолла. Конференция сыала-соруга: култуура уонна ускуустуба эйгэтин үлэһиттэрин, кыттааччылары духуобунай-сиэр-майгы, патриотическай иитии, интеллектуальнай уонна айар үлэлэрин салгыы сайыннаралларыгар усулуобуйаны тэрийии буолар. Бу манна кыттааччылар култуураҕа үлэлээбит биир идэлээхтэрин туһунан сырдаппыт, чинчийбит үлэлэрин кэпсээтилэр.
Конференция үс хайысханан үлэлээтэ ол курдук: бастакы хайыска «Писатели-юбиляры», иккис хайыска “Культура в призме времен: вчера, сегодня, завтра”, үһүс хайысха «Легенды и предания Чурапчинского улуса». Кыттааччылар бары да олус интэриэһинэй тиэмэлэри талан, киһини толкуйдатар үлэлэри билиһиннэрдилэр. Дьүүллүүр сүбэҕэ үлэлээтилэр: култуура управлениетыттан Е.Д. Дьячковская, М.И. Васильева, ону тэҥэ киин бибилэтиэкэттэн Д.П.Егасова.
Түмүккэ дьүүллүүр сүбэ быһаарыытынан бастакы хайысхаҕа 1 үрдэли – Толстоухова М.П.,(Хоптоҕо) 2 үрдэли – Тотонова Е.Н.(Алаҕар), 3 үрдэли – Иванова Т.А. (Хоптоҕо) ыллылар.
2 хайысхаҕа: 1 үрдэли – Захарова К.К. (Чурапчы), 2 үрдэли – Душкина В.И.(Чурапчы), 2 үрдэли – Николаев А.Г. (Чурапчы), 3 үрдэли – Захаров А.А.(Чурапчы), Аммосова А.В. (Сылан) ыллылар.
3 хайысхаҕа: 1 үрдэли – Владимиров В.Н. (Болугур)
Бу күн ааҕар саалаҕа Чурапчы нэһилиэгин олохтоохторо сылын аайы ыытыллар норуоттар икки ардыларынааҕы «Кыайыы дьыктаана» историческай аахсыйаҕа кытыннылар. Быйылгы дьыктаан Г.К.Жуков төрөөбүтэ 130 сылыгар, Аҕа дойду Улуу сэриитин сүрүн түгэннэригэр уонна Анал байыаннай дьайыыга, өйдөбүнньүк дааталарга ананан ыытылынна. Бу аахсыйа дьыктаан историяны, аатырбыт дьоруойдар хорсун быһыыларын төһө дьон билэрин тургутан көрөр аналлаах. Быйыл биһи бибилэтиэкэбитигэр уопсайа 22 киһи кыттыыны ылла. Сорудаҕы 45 мүнүүтэ иһигэр толордулар. Кыттааччыларга туоһу сурук туттарылынна, түмүк таҕыста эрэ кыайыылаахтар дипломунан наҕараадаланыахтара.
