Алтынньы 5 күнүгэр Чурапчы киин бибилэтиэкэтигэр Саха Өрөспүүбүлүкэтигэр Үлэ, Чурапчы улууһугар Ытыктабыл сылларыгар анаммыт «Дьоло — дьону үөрдүүгэ» диэн истиҥ көрсүһүү буолан ааста.Көрсүһүүбүт ыалдьыта ССРС култууратын туйгуна, Саха АССР култууратын үтүөлээх үлэһитэ, Чурапчы улууһун, Чурапчы нэһилиэгин, Уус-Алдан улууһун Байаҕантай нэһилиэктэрин бочуоттаах олохтооҕо, Чурапчы улууһугар үтүөлэрин иһин I-II-III истиэпэннэрэ, «Гражданскай килбиэн» бэлиэлэр хаһаайыннара, Саха Өрөспүүбүлүкэтин култууратын уонну ускуустубатын бочуоттаах үлэһитэ, Саха Өрөспүүбүлүкэтин бочуоттаах бэтэрээнэ, АБ суруналыыстарын сойууһун чилиэнэ, үйэтитээччи, хас да кинигэ ааптара, киэҥ туттар, ытыктыыр, холобур оҥостор киһибит — Надежда Михайловна ЗАБОЛОЦКАЯ.Бу күн Надежда Михайловна айар үлэтигэр бииргэ айымньылаахтык үлэлээбит, биир эйгэҕэ үлэлии сылдьар кэрэни кэрэхсиир араас көлүөнэ дьон кини үтүө холобуругар үөрэнээри, кэрэ кэпсээнин истээри тоҕуоруһа муһунна.Истиҥ көрүһүүнү киин бибилэтиэкэ исписэлииһэ Римма Викторовна Петрова иилээн-саҕалаан ыытта.Надежда Михайловна хайдах айар үлэ аартыгар үктэммитин, устудьуон сылларын, Чурапчыга аан маҥнай кэлиитин туһунан ирэ-хоро сэһэргээтэ. Режиссер быһыытынан бастакы үлэтин Иван Михайлович Гоголев-Кындыл «Үрүҥ көмүс иҥэһэ» айымньытынан испэктээх турорбутун туһунан кэпсээтэ. Бу айымньы уопсайа 4 төгүл саҥардыллан, уларытыллан суруллубут эбит. Кини тустаах үлэтин, дьиэтээҕи түбүгүн таһынан общественнай үлэҕэ эмиэ сылдьара, общественнай тэрилтэлэри салайара. Райсовет, Улуус Мунньаҕын депутатынан талыллан дьонуҥ-сэргэтин олоҕо тупсарыгар үлэлээбитин туһунан сырдатта.Режиссер үлэтиттэн хайдах Арчы дьиэтигэр үлэлии барбытын туһунан ахтан-санаан ылла. Надежда Михайловна Арчыбын дьиэтэ сыалын-соругун, үлэтин хаамыытын торумнаан, хайысхалаан дьон-сэргэ сөбүлээн сылдьар дьиэтэ буолбута. «Тыыннаах тыл» литературнай куруһуогу иилээн-саҕалаан ыыппыта, сыллата ыытыллар «Аман өс» уус-уран ааҕыы куонкуруһун тэрийэн ыытара.Көрсүһүү кыттыылаахтара Надежда Михайловнаттан таптыыр хоһоонун ааҕан иһитиннэрэригэр көрдөспүттэрэ, онно кини Иннокентий Артамонов «Ийэ тыл» хоһоонун уустаан-ураннаан, туох баар иэйиитин киллэрэн туран аахта.Истиҥ көрсүһүүгэ мустубут биир эйгэҕэ үлэлээбит, алтыспыт дьоно, кини үлэтин салҕыыр үлэһиттэр тыл эттилэр, урукку кэми ахтан-санаан аастылар. Көрсүһүү Арассыыйа Суруйааччыларын сойууһун чилиэнэ Роман Данилов истиҥ, иһирэх анабыл хоһоонунан түмүктэннэ. Кэлбит ыалдьыттар бары үөрэн-көтөн, астынан-дуоһуйан тарҕастылар.