Бу күннэргэ нэһилиэк оскуолаларын үөрэнээччилэригэр  биир дойдулаахпыт, саха народнай суруйааччыта  Яковлев Василий Семенович — Далан олоҕор уонна  айар үлэтигэр аналлаах уруоктар ыытылла тураллар. Муус устар 5 күнүгэр улуустааҕы киин библиотекаҕа  «Дьикти саас»  оҕолоро»    литературнай уруокка  Далан үөрэнээччитэ, суруйааччы, суруналыыс  Павел Петрович Фёдоров – Сомоҕо   С.А. Новгородов аатынан  Чурапчы орто оскуолатын 10 кылааһын үөрэнээччилэрин  (сал.Платонова С.Д) кытта  көрүстэ. Павел Петрович учууталын туһунан «Умнуллубат  «Дьикти саас оҕолоро» (2008), «Учуутал дьоло — үөрэнээччилэрин ситиһиилэригэр» (2012), «Боотур уустан Ил Дархан» (2015), «Дьикти саас» көлүөнэттэн көлүөнэҕэ» (2023)   дьоһун кинигэлэри таһааттарбыта. Уруокка  суруйааччы  Яковлев В.С.-Далан баай, сүҥкэн суолталаах литературнай нэһилиэстибэтэ сырдатылынна.  «Дьикти саас» сэһэн тула  кэпсэтии буолла. В.С. Яковлев –Далан  учууталлыы сылдьан үөрэтэр оҕолоруттан уус-уран  уобарастары хомуйан, айан-суруйан таһаарбыт  оскуоланы бүтэрээри сылдьар  оҕолор тустарынан  айымньыта  дьон-сэргэ, ааҕааччы  киэҥ  сэҥээриитин ылбыта. Павел Петрович  учууталын туһунан, бииргэ үөрэммит  16-с, 18 –с выпуск  оҕолорун, оскуолаҕа үөрэммит кэмнэрин  истиҥник кэпсээтэ. Айымньы геройдарын уобарастарын туһунан сырдаппытын оҕолор сэргээтилэр. Далан үөрэппит оҕолоро улаатан, үүнэн-сайдан, туруу үлэһит дьон буолан  республика араас муннуктарыгар олорон үлэлээн- хамнаан кэлбиттэрэ. Кинилэр  ортолоругар  Россия, республика, улуус сайдыытыгар  дьоһун кылааттарын киллэрбит киэн туттар биир дойдулаахтарбыт  бааллар. Улуустааҕы киин библиотека Далан үөрэнээччитэ, бөдөҥ общественнай -политическай диэйэтэл, Федерация Сэбиэтин  сэнээтэрэ Борисов Егор Афанасьевич аатын сүгэр. Оҕолор суруйааччы кэрэхсэбиллээх айымньытын туһунан бэрт үгүһү  биллилэр. Павел Петрович оҕолорго  эдэр-эрдэхтэн куруутун эйэлээх, бэйэ-бэйэҕэ көмөлөһөр, доҕордуу буолалларыгар, кинигэни ааҕалларыгар «хас биирдии улуу киһи ааҕар буолан ситиһиилэммитэ” диэн сүбэтин, баҕа санаатын эттэ. Саха народнай суруйааччыта Яковлев Василий Семенович — Далан олоҕун уонна айар үлэтин туһунан  ыйыллыбыт сигэнэн киирэн билсиҥ, ааҕыҥ! https://churlib.saha.muzkult.ru/pisateli