Чурапчыга «Библионочь — 2026» сэргэх тэрээһин ыытылынна
Муус устар 17 күнүгэр Е.А. Борисов аатынан киин библиотекаҕа бүтүн Арассыыйа үрдүнэн бэлиэтэнэр “Библионочь” аахсыйа 15 төгүлүн “Арассыыйа күүһэ — норуоттар сомоҕолоһууларыгар” диэн девиһинэн ыытылынна. Тэрээһин үөрүүлээх чааһыгар Чурапчытааҕы кииннэммит библиотечнай ситим директора Айталина Смирникова кэлбит ыалдьыттары, ааҕааччылары “Библионочь” акция аһыллыбытынан эҕэрдэлээтэ, ыҥырыылаах ыалдьыттарга махтанна. Тэрээһиҥҥэ биһиги Чурапчыбыт нэһилиэгэр олохсуйан ыал буолан, дьиэ уот тэринэн, иккис дойду оҥостон олорор араас омуктар бэрэстэбиитэллэрэ кыргыыс омук Назира Сатабылдиева, дьэһиэй сахата, Д.П.Коркин аатынан Чурапчытааҕы спортивнай оскуола интэринээт үөрэнээччитэ Володя Эспек, славян омук Геннадий Нестерев, кэриэй хааннаах, оскуола үөрэнээччилэрэ, убайдыы – бырааттыы Виссарион, Айгылаан Слепцовтар ыалдьыттаан, олус интэриэһинэйдик бэйэлэрин култуураларын, бүлүүдэлэрин, бырааһынньыктарын, таҥастарын билиһиннэрдилэр.
Сылын аайы ыытыллар дьон-сэргэ сөбүлүүр библионочь тэрээһинин нэһилиэкпит дьоно өйүүллэр, биһирииллэр. Ол курдук быйыл дьикти дьарыктаах коллекционердар кэлэн көхтөөхтүк кытыннылар. Араас омук куукулаларын баай коллекциятын Розалия Пономарева туруорда. Розалия Степановна 2014 сыллаахтан саҕалаан хомуйан билигин бу коллекциятыгар барыта 75 куукула киирбит. Олус сиэдэрэй оҥоһуулаах, дьэрэкээн таҥастаах куукулалар кэлбит дьон сэҥээриитин ыллылар.
Өссө биир интэриэһинэй быыстапканы Коркина Елизавета Николаевна туруорда. Кини коллекциятыгар чэй уонна араас ас угуллар сиэдэрэй оҥоһуулаах ньаалбаан хоруопкалара бааллар. Саамай былыргы 19-с үйэ ортотугар оҥоһуллубут минньигэс бэчиэнньэ , кэмпиэт угуллар хоруопката дьон-сэргэ болҕомтотун тарта.
Салгыы араас хайысхалаах интэриэһинэй оонньуулар, күрэхтэр, маастар кылаастар утуу-субуу ыытылыннылар. Ол курдук, “Библионочь” кыттыылаахтара Надежда Ахматова органзаттан сибэкки оҥоруутугар, Зоя Сивцева саха аһын “Тары” уонна “Аһытыы” оҥорууга сүбэлэригэр, ньымаларыгар, Иван Бушков оҥоһуу өйү туһанан открыткалары оҥорууга маастар кылаастарыгар сылдьан элбэҕи, саҥаны билэн, бэйэлэрэ оҥорорго үөрэнэн астыннылар.
“Игры народов” арааһынай остуол уонна хамсаныылаах оонньуулар ыалдьыттары сэргэхситтилэр. Тэрээһин кыттыылаахтара Леонид Афанасьевич Федоров ааптардаабыт сахалыы оонньууларын олус астыннылар, биһирээтилэр.
“Звонкий голос дружбы” күрэх хоһоон ааҕааччылары түмтэ, бү киэһээ сахалыы, нууччалыы тылынан араас омук суруйааччыларын хоһоонноро, тылбаастара ааҕылыннылар. Ырыа куттаахтар “Песни от всей души” караоке — ырыа түһүлгэтигэр дуоһуйа ыллаатылар, «Угадай мелодию» күрэххэ кытыннылар.
Ону сэргэ “Дом цветов” маҕаһыын үлэһиттэрэ сиэмэлэри, уоҕурдуулары атыылаатылар, үүнээйини көрүүгэ-харайыыга туһалаах сүбэлэри биэрдилэр. Лидия Ермолаева «Рофес» аппаракка түһэрэн кэлбит ыалдьыттар доруобуйаларын бэрэбиэркэлэннилэр. Ити курдук сылын аайы ыытыллар «Библионочь -2026» аахсыйаҕа элбэх киһи кыттан, олус сэргэхтик ааста. Аахсыйа кыттыылаахтара тематическай фотозоналарга хаартыскаҕа түһэн, доруобуйаҕа туһалаах утах чэй арааһын амсайан, үөрэн-көтөн, астынан, сэргэхсийэн тарҕастылар.
Бу аахсыйа сыала-соруга библиотека оҥорор өҥөтүн араас элбэх өрүтүн арыйыы, ааҕыыны сайыннарыы, библиотека өҥөтүнэн туһанааччы ахсаанын элбэтии буолар.Онон бу үтүө үгэскэ кубулуйбут сыллата ыытыллар аахсыйаҕа библиотека үлэһиттэрэ айымньылаахтык сыһыаннаһан, саҥаттан саҥа ааҕааччыны интэриэһиргэтэр, угуйар көрүҥнэри толкуйдаан, тэрээһини үрдүк таһымҥа ыытан, ааҕааччы сэҥээриитин ыларга кыһаллаллар.
