«Чурапчы оройуонун, улууһун бочуоттаах гражданнара» кинигэ сүрэхтэниитэ буолла
Тохсунньу 26 күнүгэр улуус дьаһалтатын дьиэтигэр улууспут тэриллибитэ 95 сылын чэрчитинэн бэчээттэнэн тахсыбыт «Чурапчы оройуонун, улууһун бочуоттаах гражданнара» кинигэ сүрэхтэниитэ буолла. Кинигэ ааптара ССРС эргиэнин туйгуна, Россия потребкооперациятын туйгуна, «Россия потребительскай кооперациятын сайдыытыгар кылаатын иһин” уордьан кавалера, СӨ спордун Бочуоттаах бэтэрээнэ, Россия Суруналыыстарын сойууһун чилиэнэ, Чурапчы улууһун Бочуоттаах гражданин Герасим Степанович Платонов. Кинигэни хомуйан оҥордулар Я.П.Оконешников, Г.С.Платонов, Н.С.Борисова. Кинигэ 2025 сыллаахха Дьокуускай куоракка “Көмүөл” кинигэ кыһатыгар 70*100 размердаах 350 экземплярынан 408 страницалаах кээмэйинэн бэчээттэнэн тахсыбыт.
Кинигэ Чурапчы улууһун, оройуонун Бочуоттаах гражданнарын үлэлэрин, оройуон, улуус сайдыытыгар киллэрбит кылааттарын, үлэлээн ааспыт кэмнэрин сиһилии сырдатар. Уопсайа бу бочуоттаах аат 1967 сыллаахха олохтонуоҕуттан 2025 сылы киллэрэн туран 298 бочуоттаах гражданнар киллэриллибиттэр. Ааҕааччы киэҥ араҥатыгар ананар.
Улууспут историята буолар бочуоттаах гражданнарбытын үйэтитэр кинигэ сүрэхтэниитин иилээн ыытта В.А.Платонова. Тэрээһиҥҥэ кыттыыны ыллылар араас сылларга бочуоттаах ааты ылбыт ытык дьоммут-сэргэбит, улуус, нэһилиэк дьаһалталарыттан, ону тэҥэ киэҥ общественность. Ытык дьоммут кинигэни бэлэх тутан тэрээһинтэн үөрэн, астынан тарҕастылар.
