Муус устар 15 күнүгэр СӨ суруйааччыларын союһун чилиэнэ, СӨ үөрэҕэриитин туйгуна, СӨ үөрэҕэриитин бочуоттаах педагога, “Гражданскай килбиэн” бэлиэ хаһаайына Гаврил Иннокентьевич Адамов-Сайдам “Атаҕастабыллаах кырдьык” диэн Чурапчы хоту Көһөрүллүү уонна Туой-Хайа туһунан историческай кинигэтэ улуустааҕы Е.А.Борисов киин библиотекатыгар  сүрэхтэннэ.    Тэрээһини иилээн-саҕалаан ааҕааччыны кытта үлэлиир отдел сэбиэдиссэйэ Марфа Николаевна Кузьмина  бэрт сэргэхтик ахтыы, анаарыы, эҕэрдэлээһин быһыытынан  ыытта. Бу күҥҥэ бииргэ алтыспыт дьоно-сэргэтэ, биир дойдулаахтара, саха литерауратын сэҥээрээччилэр  тоҕуоруһа  мустаннар, эҕэрдэ тылларын, санааларын, кинигэ туһунан көрүүлэрин эттилэр. “Чурапчы улууһа» МТ  депутааттарын  Сэбиэтин бэрэссэдээтэлэ Яков Павлович Оконешников тыл эттэ, эҕэрдэ сурук туттарда. Биир дойдулаахтара, аймахтара уонна Чакыр нэһилиэгин баһылыга Лебедев Константин Иннокентьевич суруйааччынан киэн тутталларын уонна Эрилик Эристииҥҥэ маарыннатан кырдьыгы суруйарын хайҕаан бэлиэтээтилэр. Чурапчы литературнай түмсүү чилиэттэрэ биир-биир эҕэрдэлээн, сэмэй бэлэхтэрин туттардылар, онтон эҕэрдэ нүөмэринэн Попова Надежда Никифоровна автор хоһоонун ааҕан иһитиннэрдэ уонна хомус тыаһынан алгыс тыллары тириэртэ. Суруйааччылар сойуустарын чилиэнэ Наталья Гаврильевна Захарова бу кинигэҕэ киллэрбит хоһоонун ааҕан иһитиннэрдэ. Тэрээһин кыттыылаахтара айымньыны  биһирээн, өссө да айар аартыга арылла турдун диэн баҕа санааларын  эттилэр.Түмүккэ,  Гаврил Иннокентьевич кэлбит дьоҥҥо  махтанна уонна кэлэр кэнчээри ыччакка история дьиҥ-чахчы кэпсэниэхтээҕин, тиэрдиллиэхтээҕин өссө төгүл бэйэтин санаатын-көрүүтүн иһитиннэрдэ.