«Алгыс – эн күүһүҥ, харысхалыҥ» кинигэ сүрэхтэниитэ буолла
Тохсунньу 29 күнүгэр Е.А.Борисов аатынан киин бибилэтиэкэҕэ «Алгыс – эн күүһүҥ, харысхалыҥ» кинигэ сүрэхтэниитэ буолла. Кинигэ ааптарынан буолар Чурапчы улууһун Мындаҕаайытыттан төрүттээх Агафья Христофоровна Петрова- Куйаар Куо буолар.
Бу кинигэ 2025 сылга “Саҥа олох” эрэдээксийэҕэ 100 ахсаанынан, кыра, тэттик А6 форматтаах, 64 страницалаах бэчээттэнэн таҕыста. Уопсайа 46 алгыс киирбит. Кинигэ таһа тупсаҕай көстүүлээх, күн сардаҥата киһи ытыһыгар түспүт ойуулаах. Кинигэ аннотациятыгар Куйаар Куо Айыылартан кэлбит этитиилээх алгыстарын дьонугар – сэргэтигэр аныыр диэн сурулллар.
Тэрээһин саҕаланыытыгар алгыстаах алаадьылаах саламаатынан, биэ кымыһынан күндүлээтилэр, Куйаар Куо бииргэ уһуйуллан, үөрэнэн тахсыбыт уһуйаанын кыргыттара: Мохначевская Тамара Николаевна, Бурцева Светлана Михайловна – Суугунай Чараана, Шарина Марфа Николаевна – Сэбээк Күн, Охлопкова Сардаана Егоровна, Макарова Валентина Григорьевна, Алексеева Елена Титовна – Элиэнэ, Бээрийэ кыыһа Хотойук Айгыына киирэннэр алгыһынан саҕалаатылар. Ону тэҥэ Мындаҕаайы нэһилиэгин администрациятыттан, бибилэтиэкэтиттэн Егорова Т.И., Николаева С.Г., бииргэ үлэлиир бөлөҕүн кыргыттара: Аманаттаах Алтаана, Айыы Кыыма, Хаарчаана, Байдаана, чугас дьүөгэлэрэ, бииргэ төрөөбүт эдьиийэ Татьяна Христофоровна эҕэрдэлэрин, истиҥ тылларын тириэртилэр.
Кэлбит ыалдьыттар Куйаар Куо тылыгар Александр Гоголев ааҕыытыгар алгыс видео, аудио матырыйааллары көрдүлэр, ону тэҥэ Варвара Орлова салайааччылаах «Дуорай» бөлөх дэгэрэҥ ырыанан, “Чурапчы” айар түмсүү чилиэнэ Степанида Попова “Алгыс ырыатынан” тэрээһини киэргэттилэр.
