Е.А.Борисов аатынан киин бибилэтиэкэ нэдиэлэтээҕи сонуннара
Тохсунньу 26 күнүгэр Дьокуускайдааҕы А.Д.Макарова аатынан култуура уонна искусство колледжын устудьуоннара кэлэн Е.А.Борисов архыып-бибилэтиэкэтигэр ыалдьыттаатылар. Бибилэтиэкэ үлэтин билистилэр, кинигэтин фондатын, сувенирдар быыстапкаларын сэҥээрдилэр.
Тохсунньу 27 күнүгэр Ленинград блокадаттан босхоломмут күнүн чэрчитинэн С.А.Новгородов аатынан Чурапчы орто оскуолатын 10, 11 кылааһын үөрэнээччилэригэр «Блокада Ленинграда» уруоктар ыытылыннылар. Уруогу ыытта ааҕааччыны кытта үлэлиир салаа бибилэтиэкэрэ А.П.Капрынова.
Тохсунньу 28 күнүгэр нолуок сулууспатын инспиэктэрэ О.Р. Кузьмина бэйэ дьарыктаах дьоҥҥо, тэрилтэ салайааччыларыгар, булгаахтырдарыгар аналлаах “НДС для налогоплательщиков УСН в 2026 году” семинар ыытта.
Тохсунньу 29 күнүгэр «Айылгы» норуот айымньытын дьиэтигэр “Сөрүө-өрүү” научнай практическай конференция буолла. Конференцияҕа киин бибилэтиэкэттэн комплектования отделын сэбиэдиссэйэ В.И.Душкина бэйэтин өбүгэлэриттэн хаалбыт “Суҥ сөрүө”, «Сиэл сөрүө» туһунан кэпсээтэ, быыстапкаҕа кытынна. Ону тэҥэ «Кылтан кынаттанан, сиэлтэн ситимнэнэн» кинигэ быыстапката турда.
Бу күн “Борисов-киин” саалатыгар кадры кытта үлэ программатын оҥорууга улуус хамыһыйатын кытта сүбэ мунньах буолла.
Тохсунньу 29 күнүгэр киин бибилэтиэкэ саалатыгар Чурапчы Мындаҕаайытыттан төрүттээх алгысчыт, көрбүөччү, уйулҕаһыт Агафья Христофоровна Петрова – Куйаар Куо “Алгыс – эн күүһүҥ, харысхалыҥ” кинигэ сүрэхтэниитэ буолла.
Тохсунньу 30 күнүгэр киэн туттар киһибит Саха АССР үтүөлээх учуутала, Аҕа дойду Улуу сэриитин кыттыылааҕа, П.А.Ойуунускай аатынан премия лауреата, «Хотугу Сулус» уордьан хаһаайына, Иван Михайлович Павлов төрөөбүтэ 105 сылын көрсө И.М.Павлов аатынан орто оскуолаҕа «Учуутал. Буойун. Суруйааччы» диэн 4,7,8,9,10,11 кылаастарга уруоктар ыытылыннылар. Уруоктарга Елена Николаевна Иван Михайлович бойобуой суолун, хорсун быһыыларын кэпсээн оҕолор болҕомтолорун тарта. Үйэтитии үлэтин сырдатан, кинигэлэрин билиһиннэрдэ. Иван Михайлович көҕүлээһининэн тэриллэн ыытыллар дьаһаллары сырдатта, кэпсээтэ.
Бу күн П.И.Борисова аатынан “Улыбка” уһуйаан төрөппүттэрин кытта холбоһуктаах бырайыак салҕанар. Бүгүҥҥү тэрээһиҥҥэ «Баҕа санаа каартатын» оҥоруу буолар. Баҕа санаа каартатын ааҕааччыны кытта үлэлиир салаа бибилэтиэкэрэ В.Е.Маркова ыйан-кэрдэн, сүбэлээн, быраабылаларынан таҥан оҥордулар.
