Е.А.Борисов аатынан киин бибилэтиэкэ нэдиэлэтээҕи сонуннара
Тохсунньу 21 күнүгэр А.К.Софронов аатынан спорт уораҕайыгар Чурапчы улууһун култууратын үлэһиттэрин спартакиадата буолла. Спорт 10 көрүҥэр биирдиилээн бастыыр иһин күөҥ көрүстүлэр. Ол курдук сахавабол, хабылык, хаамыска, корнхолл, остуол тенниһэ, дартс, оҕунан ытыы, саанан ытыы, дуобат, саахымат көрүҥнэригэр. Уопсайа барыта холбоон 120 тахса киһи, ол иһигэр бибилэтиэкэттэн 14 киһи кыттыыны ылла.
Тохсунньу 21,22,23 күннэригэр. С.А.Новгородов аатынан Чурапчытааҕы орто оскуола 8,9,10,11 кылаас оҕолоругар Саха норуодунай суруйааччыта Николай Егорович Мординов – Амма Аччыгыйа төрөөбүтэ 120 сылыгар аналлаах уруоктар ыытылыннылар. Н.Е.Мординов олоҕун, үлэтин туһунан, дьиҥнээх буолбут түбэлтэҕэ олоҕуран суруллубут «Алдьархай» сэһэнин Николай Тогойкин прототибын дьоруой Николай Дмитриевич Терешкины кытта билистилэр. Ону тэҥэ С.К. Макаров аатынан Чурапчытааҕы гимназия 6,7 кылааһын үөрэнээччилэрэ библиографическай ыйынньык, тылдьыт, картотека туһунан билистилэр. Уруогу ыыттылар ааҕааччыны кытта үлэлиир салаа бибилэтиэкэрдэрэ В.П.Лонгинова, Л.Т.Никитина, В.Е.Маркова.
Тохсунньу 23 күнүгэр аан дойдуга илиинэн суруйуу күнүн чэрчитинэн нэһилиэнньэҕэ анаан кырасыабай, каллиграфическай, ыраас буочардаахтарга аналлаах «Бастыҥ буочар» күрэҕэ буолла. Кыттааччылар Хайахсыттан төрүттээх биир дойдулаахпыт Дорофеев Аркадий Максимович — Улдьаа Харалы суруйбут «Киһи хара буолаары» диэн сэһэниттэн быһа тардыыны суруйдулар. Кылгас кээмэйдээх тиэкиһи сыыһата суох, кэрэ буочарынан устан бэйэлэрин тургутан көрдүлэр. Бүгүҥҥү тэрээһин сыала-соруга сахалыы сурукка-бичиккэ болҕомто ууруу, илиинэн быраабыланы тутуһан суруйуу умунуллубакка сүтэн, симэлийэн хаалбатын диэн буолар. Дьүүллүүр сүбэнэн үлэлээтилэр С.А.Новгородов аатынан орто оскуола алын кылаастарын учууталлара: Л.Е.Максимова, С.А.Седалищева уонна ааҕааччыны кытта үлэлиир салаа бибилэтиэкэрэ А.П.Капрынова.
Күрэх түмүгүнэн:
1 миэстэ – Р.Н. Коркина
2 миэстэ – С.И.Дорогунов
3 миэстэ – Х.П.Федулова
“Ураты буочар” номинацияҕа – Иннокентий Пинигин, «Кэрэ буочар” – Екатерина Осипова тигистилэр.
Кыттааччылар бары анал аат, туоһу сурук тутан тарҕастылар.
