Балаҕан ыйын 14 күнүгэр улуустааҕы киин библиотекаҕа  сылын аайы ыытыллар Чурапчы күнүн көрсө үгэс буолбут «Хомо5ой хоһоон түһүлгэтэ»  7 төгүлүн  хоһоону таптаан ааҕааччылары, поэзияны сэҥээрээччилэри түмтэ.  Быйылгы  түһүлгэ  дойду үрдүнэн хамсык ыарыы хааччаҕынан 15 киһиэхэ дылы көҥүллэнэн  аҕыйах кыттааччыллаах буолла. «Поэзия ыллыгынан» кинигэ быыстапкатыгар Чурапчыттан төрүттээх ааптардар хоһооннорун 42 кинигэлэрэ турдулар. Хоһоон түһүлгэтин ыалдьыттарыгар  анаан «Күһүҥҥү киһи күлбүтүнэн» диэн араас көрүҥ  минньигэс барыанньалаах сылаас сылабаар чээйэ  тэрилиннэ.  «Күһүҥҥү серенада»  фотозона киэҥ сэҥээриини ылан тэрээһин кыттыылаахтара астына  хаартыскаҕа түстүлэр. Аҕааччыны кытта үлэлиир отдел библиотекара Захарова Мотрена Николаевна ыалдьыттарга «Бэйэ5ин төһө билэҕин?” ыйытыгы,  олус интириэһинэй эти — хааны уһугуннарар, өйү-санааны чэбдигирдэр  ооньуулары ыытта. Ону сэргэ  түргэн хоһоон айыытыгар сорудах биэрэн кыттааччылар  бу түгэни  уруйдаан хоһоон айдылар. Хоһоон түһүлгэтин ааҕааччыны кытта үлэлиир отдел библиотекардара Флегонтова Саргылана Кэнчэриевна уонна Ючюгяева Сахалена Николаевна иилээн саҕалаан ыыттылар.  Күрэх дьүүллүүр субэтин бэрэссэдээтэлинэн киин библиотека ааҕааччыны кытта үлэлиир отдел салайааччыта Кузьмина М.Н, кылаабынай библиограф Лонгинова В.П., Айылгы оройуоннааҕы норуот айымньытын дьиэтэ норуот жанрдарыгар специалиһа А.П.Мунхалов хартыыналарын галереятын салайааччыта Муосчут кыыһа Айылгы Пинигина үлэлээтилэр. Кыттааччылар 2 хайысхаҕа хоьоон аахтылар: CӨ уонна Чурапчы улууһугар Чэбдигирии сылынан чөл олох туһунан  уонна көҥүл темаҕа хоһооннору аахтылар

    «Хомо5ой хоһоон түһүлгэтэ» хоһоон ааҕыытын кыайыылаахтарынан буоллулар:

   Чөл олох туһунан хоһооннору ааҕыыга I  миэстэ — Попова Надежда Никифоровна (Чурапчы)  (Саргылана Гольдерова «Киһи» хоһооно), II миэстэ – Бушуева Николанна Николаевна (Болтоҥо) («Арыгы кулута буолумаҥ» автор хоһооно),  III миэстэ – Сивцева Елизавета Петровна (Мугудай) («Олох бииргэ бэриллэр» автор хоһооно).

  Көҥүл тиэмэҕэ хоһооннору ааҕыыга I  миэстэ –Кузьмина Клара Егоровна (Чурапчы)  («Алаас ахтылҕана”   автор хоһооно), II миэстэ – Алексеев Иннокентий Илларионович (Чурапчы) («Чурапчы», “Көмүс күһүн” автор хоһооно),  III миэстэ – Дьячковская Анастасия Ионовна  (Чурапчы) («Ахтылҕан»  Харача хоһооно).

 Быйылгы «Хомо5ой хоһоон түһүлгэтэ» хоһоон ааҕыытын кыайыылаахтарын итиитик –истиҥник эҕэрдэлиибит! Сүргэни көтөҕөр хоһооннору бэлэхтии, дьону- сэргэни сэргэхситэ, үөрдэ -көтүтэ туруҥ диэн баҕа санаабытын тиэрдэбит! Бары кыттааччыларбытыгар махтанан туран чэгиэн туругу,  дьолу- соргуну баҕарабыт!