Чурапчытааҕы киин бибилэтиэкэ исписэлииһэ Вероника Маркова алтынньы 13-16 күннэригэр Владивосток куоракка бастакытын ыытыллар Уһук Илиҥҥи уокуруктааҕы «Росмолодежь» платформа көмөтүнэн тэриллэр «На волне» ыччат форумугар кыттыыны ылан кэллэ.

Кини форум туһунан бэйэтин санаатын үллэһиннэ:Бу форумҥа араас эйгэҕэ үлэлии-хамсыы, үөрэнэ сылдьар 18-35 дылы саастаах Арассыыйа куораттарын ыччата тоҕуоруһа мустан 4 күн устата үөрэннилэр, сайыннылар, бэйэ-бэйэлэрин кытта алтыһан бэрт таһаарыылаахтык кэмнэрин атаардылар.
Саха сириттэн уопсайа 4 буолан сырыттыбыт. Билсэн барбыппытыгар, бары култуура эйгэтигэр үлэлии-хамсыы сылдьар, айар-тутар дьоҕурдаах ыччаттар эбиппит. Ол курдук, Амма Сулҕаччытын кулуубун художественнай салайааччыта Матвеева Александра Николаевна, Амма култууратын салалтатын исписэлииһэ Пахомова Зоя Валерьевна, Мэҥэ Хаҥалас култууратын салалтатын методиһа Старостина Галина Еремеевна.

Форум иһинэн үс хайысхаҕа арахсан үөрэннибит:-«На волне успеха». Манна урбаанньыт , эбэтэр бэйэлэрин дьыала арыныахтарын баҕарар ыччаттар, проект, стартап туһунан опыттаах спикердартан сүбэ-ама ыллылар.
—«На волне играя». Бу эйгэҕэ IT өттүгэр үлэлиир-хамсыыр ыччат мустан оонньуулары толкуйдаатылар. Ол курдук, нейросетынан туһанарга, оонньуу концепциятын толкуйдуурга көрдөрдүлэр, үөрэттилэр.
—«На волне творчества». Манна ГиК диэн өйдөбүлү ырыттылар. Бэйэн ураты айар хаачыстыбаҕын хайдах гынан дьоҥҥо-сэргэҕэ таһааран туһалаах буоларын кэпсээтилэр.

Тус бэйэм проект туһунан өйдөбүлү үөрэтээри «На волне успеха» хайысхаҕа киирбитим.
Ыччат олус эдэр, элбэх креативнай идеялаах, энергиялаах, амбициялаах. Сорохтор идеяларын олоххо киллэрэн, стартаптаах кэлбиттэр.
Бу хайысха интириэһинэйэ диэн — олох билсибэт дьоҥҥун кытта биир группаҕа түбэһэҕин. Хамаанданан проект толкуйдаан спикердар иннилэригэр көмүскүүргэ бэлэмнэнэҕин.
Манна календарнай былаан, смета, дизайн, продвижение, смм, маркетинг — барытын хамаанданан толкуйдуурга, оҥорго үөрэттилэр. Онон спикердар сүбэлэрин тутатына туһанар түгэн буолар эбит. Ол түмүгэр, тус бэйэн олоххо хайдах дьону кытта алтыһарын, кэпсэтэрин, толкуйдуурун, күүстээх, мөлтөх өрүтүн көстөн кэлэр эбит. Биһиги проекпыт үс экспертэн өйөбүл ылан кыайыылааҕынан тахсыбыппыт.

Маннык тэрээһиҥҥэ саха ыччата тылга — өскө улахан барьер оҥостубакка, дьону-сэргэни кытта тэҥҥэ алтыһан, талааннара, өйдөрө-толкуйдара эмиэ таһымнаах эбит дии санаатым.Ол иһин, саха ыччата түгэни мүччү туппакка хамаанда оҥостон актыыбынайдык кыттан иһиэххэ наада дии санаатым.
Форумнарга олус судургутук ыҥырыыны ылыахха сөп. Ол курдук https://events.myrosmol.ru сайтка киирэн сыл аайы ыытыллар Арассыыйа араас куораттарыгар буолар форумнарга этиллибит сроктарыгар регистрация ааһаҕын. Тус бэйэм бииргэ эрэ буолбакка хас даҕаны форумҥа тэҥҥэ сайаапка ыыппытым. Манна бэйэн тускунан толору суруйуохха наада. Оттон иккис этаабыгар кыра тест ааһаҕын. Ол кэннэ ыҥырыы сурук тутаҕын. Бу саас Аан Дойду таһымнаах форум Сочи куоракка буолаары турар.Баран кэлиим үчүгэй өрүтэ диэн Саха сирин Ыччатын Министерствотын программатыгар түбэһэн улуус ыччатын отдела айанныыр проездкын уйунар эбит.Түгэнинэн туһанан Чурапчы администрациятын ыччат отделын специалиһыгар Хомус Александра Егоровнаҕа уонна Чурапчы нэһилиэгин общественнай ыччат хамсааһынын салайааччытыгар Петрова Марфаҕа махталбын тиэрдэбин.Форум тэрийээччилэрэ олорор гостиницаны, трансферы, аһылыккын уйуналлар. Ол иһин ыччат барарыгар-кэлэригэр олус улахан кыаҕы биэрэр эбит.

Тус бэйэм тэрээһин кэнниттэн, инники кэмҥэ IT олус күүскэ сайдаары турарын өйдөөн көрдүм. Балысхан сайдыы кэмигэр активнай позициялаах, сыаллаах-соруктаах, эрчимнээх ыччаттар инники күөҥҥэ тахсыахтара диэн түмүккэ кэллим.