Алтынньы 29 күнүгэр улуустааҕы Е.А.Борисов аатынан киин бибилэтиэкэҕэ  “Үүн-сайын» диэн медиалаборатория аһыллыытыгар аналаах үөрүүлээх тэрээһин буолла.Бу медиалаборатория бырайыага культура национальнай бырайыак чэрчитинэн Саха өрөспүүбүлүкэтигэр муниципальнай модельнай бибилэтиэкэлэри тэрийии куонкуруһугар өрөспүүбулүкэттэн 1300000 солкуобай суммалаах субсидияны ылары ситиһэн, улуустан 65000 солкуобай утары үбүлээһин оҥоһуллан тэрилиннэ. “Үүн-сайын» медиалабароторияҕа нэһилиэнньэ бары араҥатыгар саастарыттан тутулуга суох билиини-көрүүну кэҥэтэргэ, бэйэ дьоҕурун, сатабылын сайыннарарга, саҥа технологиялары баһылыырга, көдьүүстээхтик туһанарга киэҥ хабааннаах бибилэтиэкэ өҥөтө оҥоһуллар буолуоҕа. Маны тэҥэ төрөөбүт тылбытын сайыннарар, харыстыыр сыаллаах аудиостудия үлэтин салҕыы кэҥэтэн иһэрэ былааннанар. Үөрүүлээх аһыллыыга улууспут баһылыга С. А. Саргыдаев, улуустааҕы культура управлениятын начальнига П.Е.Гуляев кыттыыны ыллылар, бэйэлэрин эҕэрдэлэрин тириэртилэр. Кииннэммит библиотечнай ситим бары филиаллара медиалабаратория аһыллыытыгар сырыттылар. Ону тэҥэ бу күн Национальнай бибилэтиэкэ сүрүн исписэлиистэрэ кыттыылаах бибилэтиэкэ фондатын тэрийии уонна харайыы боппуруостарыгар онлайн-семинар ыытылынна.Бары улууспут олохтоохторун “Үүн-сайын” медиалабароторияҕа көхтөөхтүк сылдьан бэйэҕитин сайыннараргытыгар ыҥырабыт.