«Үп салаатын кэрдиис кэмнэрэ» кинигэ сүрэхтэниитэ
Ахсынньы 19 күнүгэр – үп салаата тэриллибитэ 95 сыллаах историятын сырдатар “Үп салаатын кэрдиис кэмнэрэ” бэртээхэй, саҥа кинигэ бэчээттэнэн таҕыста.
«Үп салаатын кэрдиис кэмнэрэ» диэн кинигэ Дьокуускайга, «Көмүөл» кинигэ кыһатыгар 2025 с. бэчээттэнэн күн сирин көрдө. Кинигэни үбүлээн таһаарда: Чурапчы улууһун үпкэ управленията. Салайааччы Т.Т.Брызгаева, кинигэни хомуйан оҥордулар: Л.Р.Ноева, Н.С. Борисова. Кинигэ улахан форматтаах, халыҥ тастаах, тупсаҕай оҥоһуулаах, хаачыстыбалаах полиграфиялаах, 180 стр-х. Страницаларыгар колонтитуллаах.
Үп салаатын кэрдиис кэмнэрэ. МТ «Чурапчы улууһун (оройуонун)” үбүн салаата. Саха сирин киин судаарыстыбаннай уонна Чурапчы улууһун муниципальнай архыыптарын докумуоннарыгар, тэрилтэ бэтэрээннэрин, билигин үлэлии сылдьар үлэһиттэрин ахтыыларыгар олоҕуран Чурапчы улууһун үп салаатын эйгэтин үлэһиттэрин үйэтитэр, сырдатар кинигэ. Ааҕааччы киэҥ араҥатыгар ананар диэн аннотациялаах.
Кинигэ уопсайа V түһүмэхтэн турар. Кинигэ оформленията, дизайна, өҥө-дьүһүнэ олус үчүгэйдик, табыгастаахтык талыллыбыт. Ол курдук, киһини уоскутар, үөрдэр, сырдык-сымнаҕас өҥ-дьүһүн үп эйгэтэ бигэ туруктаах диэн инникигэ, сайдыыга, кэскилгэ эрэли үөскэтэр. Үйэтитиигэ аналлаах бэртээхэй кинигэ, история кэрэһитэ буолан тахсыбыт.
Бу тэрээһиҥҥэ улуус баһылыга Саргыдаев С.А., улуус сэбиэтин бэрэссэдээтэлэ Оконешников Я.П., үп салаатыгар үлэлии сылдьыбыт ветераннар, нэһилиэк баһылыктара, тэрилтэ салайаачылара кэлэн эҕэрдэлээтилэр, урукку кэмнэри санаан, ахтан аастылар. И.Н.Винокуров аатынан «Айылгы» норуот айымньытын дьиэтин үлэһиттэрэ кэлэн ырыанан киэргэттилэр.
Үп салаатыгар урукку кэмнэргэ үлэлээн ааспыт салайааччыларыгар аналлаах , ону тэҥэ үлэһиттэр бэйэлэрэ тикпит, оҥорон таһаарбыт таҥастарын, киэргэллэрин быыстапкалара турда.
Биэчэр үөрүүлээх арыллыытын ыытта И.И.Бушков, кинигэ ис хоһоонун ырытта Е.А.Борисов аатынан киин бибилэтиэкэ «Борисов» отделын салайааччыта В.А.Платонова.
