«Үйэлэргэ албан аат» диэн кинигэ сүрэхтэниитэ.
Новости
 |
 |
| Ахсынньы 14 күнүгэр киин библиотека тэрийиитинэн, Zoom онлайн площадкаҕа СӨ Ил Түмэн Судаарыстыбаннай Мунньаҕын сис кэмитиэтин старшай референа, норуот депутатын көмөлөһөөччүтэ, СӨ култууратын туйгуна, Россия Суруналыыстарын сойууһун чилиэнэ Светлана Владимировна Диодорова-Лаврентьева Улуу Кыайыы 75 сылынан «Үйэлэргэ албан аат» диэн аҕаларыгар, эһээлэригэр, хос уонна хос-хос эһээлэригэр Одьулуун нэһилиэгин уонна Чурапчы улууһун Бочуоттаах гражданиныгар Сибиряков Гермоген Марковичка анаан, хомуйан оҥорбут кинигэтэ сүрэхтэннэ. Кинигэҕэ Гермоген Маркович аймахтара, оҕолоро, сиэннэрэ суруйбут ахтыылара, хаартыскалара киирбиттэр. Кинигэ кэрэхсэбиллээх сыһыарыытынан Гермоген Маркович төрүччүтэ оҥоһуллубут. Ааптар «Төрүччүбүт силиһин-мутугун, өбүгэлэрбитин Сэһэн Боло 1935 сыллаахха бэйэтин төрүттэрин Эллэй Боотуртан саҕалаан оҥорбут таблицатын туһанным. Эллэйтэн саҕалаан бэйэм үс ыйдаах сиэн уолбар Ньургуҥҥа диэри, 7 үйэни ситимнээн 17 көлүөнэни таһаардым. Аныгы олох көрдөбүлүгэр эппиэттиир гына анал программаҕа киллэрэн оҥордум» диэн суруйбут. Гермоген Маркович олорон ааспыт кэмин, олоҕун оҕолоро, сиэннэрэ, хос сиэннэрэ, аймахтара, ыҥырыылаах ыалдьыттар истиҥ иһирэх тылынан аҕыннылар. |
