Ыам ыйын 7 күнүгэр Аҕа дойду сэриитин кыттыылааҕа, үлэ, спорт бэтэрээнэ, ССРС кинематографиятын туйгуна Картузов Алексей Дмитрьевич туһунан «Дэгиттэр талааннаах Алексей Картузов» диэн кинигэ сүрэхтэниитэ буолла. Кинигэ 2024 сыллаахха Дьокуускай куоракка «Данил-Алмас» кинигэ кыһатыгар 50 экземплярынан 60*84/16 кээмэйдээх 154 страницалаах бэчээттэнэн тахсыбыт. Кинигэ халыҥ тастаах, тупсаҕай оҥоһуулаах, форзацтарыгар А. Д. Картузов бойобуой наҕараадаларын уонна дойдутун Болтоҥо бэлиэ сирдэрин хаартыскалара киирбиттэр. Ис тутула аан тыллаах, 8 бастан турар, элбэх хаартыскаларынан байытыллыбыт. Бу кинигэҕэ Аҕа дойду Улуу сэриитин кыттыылааҕа, үлэ уонна спорт бэтэрээнэ, дэгиттэр талааннаах худуоһунньук А. Д. Картузов дьоһун олоҕо сырдатыллар. Кини бииргэ төрөөбүт, алтыспыт дьонун, аймахтарын, оҕолорун-урууларын ахтыылара киирбиттэр. Ааҕааччы киэҥ араҥатыгар ананар диэн суруллубут. Бүгүҥҥү тэрээһиҥҥэ Алексей Дмитрьевич уруһуйдаан хаалларбыт уруһуйдара, кинигэ быыстапкалара, турда. Кинигэ сүрэхтэниитигэр кыттыыны ыллылар Чурапчы улууһун баһылыгын социальнай боппуруостарга солбуйааччы М. Ф. Кронникова,Чурапчы улууһун култуура управлениятын начальнига П. Е. Гуляев, С. К. Макаров аатынан Чурапчытааҕы гимназия дириэктэрэ Ю. М. Сивцев, Любовь Алексеевна бииргэ үлэлээбит коллегалара саха тылын учууталлара, А. А. Саввин аатынан Чурапчытааҕы түмэл үлэһитэ Ю. С. Толстоухов, аймах билэ дьонноро биир дойдулаахтара. Кинилэр бэйэлэрин санааларын үллэһиннилэр, эҕэрдэлэрин, истиҥ тылларын тириэртилэр. Биэчэри иилээн-саҕалаан ыытта, кинигэни ырытта ааҕааччыны кытта үлэлиир отдел сэбиэдиссэйэ М. Н. Кузьмина.