Василий Федорович Посельскай “Кылыйар кырдал ыҥырар” кинигэтин дойдутун дьонугар сүрэхтээтэ.
Олунньу 20 күнүгэр спорду олоҕун аргыһа оҥостубут, сахас пордун сырдатыыга биир солбуллубат суруналыыс, Василий Федорович Посельскай “Кылыйар кырдал ыҥырар” кинигэтин дойдутун дьонугар сүрэхтээтэ.
Кинигэ Дьокуускай куоракка Сайдам кинигэ кыһатыгар 2025 сыллаахха 488 страницалаах, 300 экземплярынан, орто форматтаах бэчээттэнэн таҕыста. Кинигэ бэлэм оригинал-макета «Сайдам» кинигэ кыһатыгар оҥоһуллан, Ю.А.Гагарин аатынан Саха Өрөспүүбүлүкэтээҕи типографиятыгар бэчээттэммит, Национальнай ыстаныы Федерацията үбүлээһининэн тахсыбыт. Кинигэ олус тупсаҕай көстүүлээх, халыҥ тастаах, спортивнай суруналыыс Василий Посельскай уонна өрөспүүбүлүкэ атах оонньууларын спортсменнарын ыстаныыларын түгэниттэн хаартыскаларынан ситэриллибит. Кинигэ уопсайа 8 түһүмэхтэн турар, ол курдук «Олоҕум суола», «Атах оонньуулара — үйэттэн үйэҕэ»,»Уһуйбут дьоһун дьонум», «Албан ааттары сырдатар», «Куорсуннаах күрэхтэһиилэр»,»Үлэни уонна успуорду дьүөрэлээн», «Баһылай Манчаары спратакиадалара», «Бииргэ. Түмсүүлээхтик».
«Кылыйар кырдал ыҥырар» кинигэҕэ атах оонньуутугар Саха АССР уонна РСФСР спордун маастардара, Баһылай Манчаары I спартакиадатын оҕолорго кылыыга уонна ыстаҥаҕа чөмпүйүөнэ, улахан дьоҥҥо Баһылай Манчаары, Саха сирин норуоттарын уонна Дальнай Восток, Сибиир спартакиадаларын призера, Россия ветераннарын чэпчэки атлетикаҕа чемпионаттарын үстэ төхтүрүйэн ыстаныыга (тройнойга) уонна уһуну ойууга кыһыл көмүс, үрүҥ көмүс мэтээллэрдээх, олоҕун спорка, спорду сырдатыыга анаабыт спортивнай суруналыыс В.Ф.Посельскай спорка бастакы хардыыларын, ситиһиилэрин, атах оонньуутун бастыҥ спортсменнарын уонна кинилэр тренердэрин, бииргэ алтыспыт кылыыһыт доҕотторун уонна олоҕун, үлэтин туһунан суруйуулара түмүллэн киирбиттэр. Ааҕааччы киэҥ араҥатыгар ананар диэн кинигэ аннотациятыгар суруллубут.
Бүгүҥҥү тэрээһиҥҥэ Василий Федорович айар үлэтин сэргиир, сэҥээрэр, бииргэ алтыспыт, алтыһа сылдьар биир дойдулаахтара, үөлээннээхтэрэ ыалдьыт буолан кэлэн кытыннылар. Чурапчы улууһун депутаттарын сэбиэтин бэрэссэдээтэлэ Я.П.Оконешников, Чурапчы улууһун култуура управлениятын начальнига П.Е.Гуляев, Чурапчы улууһун профсойуустарын тэрилтэлэрин координационнай сэбиэтин бэрэссэдээтэлэ Давыдов Е.И., Хоптоҕо нэһилиэгин баһылыга А.Л. Бурцев, Хадаар нэһилиэгин баһылыга А.А.Степанов, суруналыыс И.П.Пономарев, өр сылларга бииргэ үлэлээбит үөлээннээҕэ А.М. Кириллин, атах оонньуутун маастара Чакыртан Н.Н.Адамов, бииргэ үөрэммит доҕотторо П.П.Федоров- Сомоҕо, Г.С.Платонов, «Саҥа олох» хаһыат бэтэрээнэ А.М. Слепцов, «Тэтим» саха араадьыйатын эрэллээх истээччитэ Н.Г.Захарова, ону тэҥэ Мэлдьэхситтэн төрүттээх биир дойдулаахтара бэйэлэрин санааларын үллэһиннилэр, эҕэрдэлэрин, истиҥ тылларын тириэртилэр. Бу көрсүһүү көҕүлээччитэ В.С.Дьяконов кэпсэтии түмүгэр бэйэтин санаатын этэн эҕэрдэлээтэ.
Василий Федоровиһы кытта куораттан биһиги биир эмиэ киэн туттар дойдулаахпыт көҥүл тустууга ССРС спордун маастара, СӨ физическай култуураҕа уонна спортка үтүөлээх үлэһитэ, СӨ «Спортка Албан аат» музейын дириэктэрэ, биллиилээх кыраайы үөрэтээччи М.Е.Друзьянов кэлсэн интэриэһинэй иһитиннэрии оҥордо уонна киин бибилэтиэкэҕэ олус сэдэх, сыаналаах кинигэлэри бэлэхтээтэ.
Түмүккэ автор В.Ф.Посельскай бэйэтин санаатын үллэһиннэ, көрсүһүүгэ кыттыбыт дьоҥҥо истиҥ махталын тириэртэ, улуус бибилэтиэкэлэригэр саҥа кинигэтин бэлэхтээтэ.
Истиҥ биэчэри иилээн-саҕалаан ыытта, кинигэни ырытта библиотечнай ситим библиограба М.Н.Кузьмина.
