В.С.Нанова- Солдатованы кытта көрсүһүү

Кулун тутар 4 күнүгэр Е.А.Борисов аатынан киин бибилэтиэкэҕэ СӨ норуотун хаһаайыстыбатын үтүөлээх үлэһитэ, култуура туйгуна, Орто Халыма, Үөһээ Бүлүү улуустарын, Өргүөт нэһилиэгин бочуоттаах олохтооҕо, СӨ суруналыыстарын сойууһун чилиэнэ, суруналыыс, сатабыллаах салайааччы Вера Степановна Нанова-Солдатованы кытта солун, интэриэһинэй көрсүһүү буолла. Кинини кытта эдэр сааһыттан бииргэ алтыһар дьүөгэлэрэ кэлсэннэр биэчэр ис хоһоонун ситэрэн-хоторон биэрдилэр. Вера Спиридоновна бэйэтин салайар үлэҕэ баай уопутуттан үллэстэн, туһалаах, наадалаах сүбэлэрин, билигин үлэлии сылдьар салайааччыларга туһаайан тиэртэ. Тус олоҕун, айар, суруйар үлэтин сырдатан, бэйэтин дириҥ филосовскай суолталаах хоһоонноруттан ааҕан, кэлбит дьон биһирэбилин ылла. Бу көрсүһүүгэ кинигэлэрин тэҥэ, уруһуйдарын быыстапката турда. Вера Нанова хоһоонноругар элбэх биллэр ырыалар суруллубуттарын бэлиэтээтэ. Бу киэһэ кини тылларыгар Чурапчы күөрэгэйэ Аграфена Кузьмина уонна култуура үлэһитэ Семен Ноговицын бэртээхэй ырыалары мустубут дьоҥҥо бэлэхтээтилэр, «Айар кыл» кырыымпаһыттар бөлөхтөрө сахалыы матыыптары оонньоон киэргэттилэр.

Көрсүһүүнү Чурапчыларга анаан айбыт оһуохайынан түмүктээн, Чурапчылары астыннарда, үөртэ. Чахчы да эргиччи талааннаах киһи, Далбар Хотун буоларын бу көрсүһүүнэн бигэргэттэ.