Кулун тутар 19 күнүгэр Е.А.Борисов аатынан киин бибилэтиэкэҕэ. “Увлекательный мир творчества, сборник творческих проектов обучающихся» диэн кинигэ сүрэхтэниитэ буолла. Кинигэни түмэн оҥордо Г.Д.Протодьяконов аатынан Алаҕар орто оскуолатын технологияҕа учуутала СӨ үөрэҕириитин туйгуна, РФ үөрэҕириитин уонна үөрэхтээһинин бочуоттаах үлэһитэ Мария Елисеевна Слепцова.

Бу кинигэ Мария Елисеевна иккис авторскай кинигэтэ буолар. Кинигэҕэ 23 сыл тухары үлэлээбит уопутун түмэн, проектар методтара диэн ньыманан оҕолору кытта эбии үөрэхтээһиҥҥэ хайдах былааннаах үлэлиирин, уруок ыытарын, дакылаат суруйтарарын туһунан, үөрэнээччилэр бырайыактыыр үлэлэрин үөрэхтэригэр уонна куруһуок дьарыктарыгар тэрийиитин итиэннэ үөрэнээччилэр айар проектарын киллэрбит. Технология учууталларыгар, куруһуок салайааччыларыгар, проектар ньымаларын интэриэһиргиир дьоҥҥо туһаайыллар.

Кинигэ 2024 сыллаахха Дьокуускай куоракка  «Арт Алгыс” типографияҕа 60*88 размердаах  50 экземплярынан 129 страницалаах кээмэйинэн бэчээттэнэн тахсыбыт. Кинигэ дизайынын Мария Елисеевна төрөппүт кыыһа «Арт-Алгыс” типография дизайнера Валентина Ивановна Кириллина олус тупсаҕай кырасыабай гына оҥорбут.

Бүгүҥҥү тэрээһиҥҥэ Мария Елисеевна бэйэтэ айан таһаарбыт үлэлэрэ,  үөрэтэр оҕолорун оҥорбут тупсаҕай оҥоһуктара, хаартыска быыстапкалара турда. Кинигэ сүрэхтэниитигэр ыалдьыт буолан кэлэннэр Чурапчы улууһун үөрэҕин управлениятыттан Моисеева А.Б, Илларионов Д.А, Чурапчы улууһун ИЗО, технология учууталларын методическай холбоһугун салайааччыта Баягантаева А.Г., үөрэппит учуутала Макарова А.Н.,  бииргэ үлэлиир коллегалара  бэйэлэрин санааларын үллэһиннилэр, эҕэрдэлэрин, истиҥ тылларын тириэртилэр.