Олунньу 19-20 күннэригэр саха тылын декадатын чэрчитинэн Чурапчы улууһугар  «Тыл — омук тыына» республиканскай форум аан бастакытын Чурапчы улууһун сиригэр-уотугар тэриллэн үлэлээтэ. Бу форум С.А.Новгородов төрөөбүт-үөскээбит түөлбэтигэр буолбута дириҥ ис хоһоону биэрдэ. 9 улуустан ыалдьыттар кэлэн, Турцияттан Хасан Хайырсевер- Хажеттепе институт аныгы түүр тылын кафедратыттан преподавателэ, наука кандидата, ХИФУ преподавателлэрэ, Санкт-Петербург СПБГУ илиҥҥи тыллары үөрэтэр институт үлэһиттэрэ, Неустроев Б.Ф.-Мандар Уус, саха тылын билимин учуонайдара, суруйааччылар уо.д.а. кэлэн кыттыыны ыла сылдьаллар. Улуустааҕы киин библиотека үлэһиттэрэ түһүлгэлэринэн үлэҕэ кыттан, иһитиннэриилэри оҥордулар: «Төрөөбүт тылынан ааҕыы суолтата»- Захарова Н.Г., «Оһуор кэпсиир кистэлэҥэ»-Флегонтова С.К., «Дьиэ кэргэҥҥэ ааҕар эйгэни тэрийии»- Захарова М.Н. Форум аһыллыытыгар уонна түһүлгэлэринэн үлэлээһиҥҥэ киин библиотека тэрийбит «Таптыыр сахам тылынан»  уонна «Саха талба таҥаһа», «Ааҕыы алгыстаах дьиэ кэргэн»  диэн кинигэлэрин быыстапкалара дьон  киэҥ сэҥээриитин ылла уонна форум үлэтин  ис хоһоонун кэҥэтэн биэрдилэр.