Ахсынньы 5 күнүгэр Е.А.Борисов аатынан киин бибилэтиэкэҕэ «Тыа сирин сайдарын туһугар» диэн Саха Өрөспүүбүлүкэтин норуотун хаһаайыстыбатын үтүөлээх үлэһитэ, Чурапчы  улууһун, 8 нэһилиэктэрин уонна Нам улууһун 2 нэһилиэгин бочуоттаах олохтооҕо Иннокентий Николаевич Аммосовы кытта   Чурапчы улууһун нэһилиэктэрин, оскуолаларын, тэрилтэлэрин эдэр салайааччыларын иһирэх көрсүһүүлэрэ, аһаҕас кэпсэтиилэрэ ыытылынна. Көрсүһүүнү Чурапчы улууһун муниципальнай оройуон баһылыгын социальнай боппуруостарга солбуйааччы Мария Филипповна Кронникова  иилээн-саҕалаан ыытта. Бу көрсүһүү чэрчитинэн И.Н.Аммосов 75 сааһын туолар үбүлүөйүн көрсө тахсыбыт саҥа кинигэтин  Е.А.Борисов архыып бибилэтиэкэтин отделын салайааччыта Вера Аполлоновна Платонова сиһилии билиһиннэрдэ. Бу кинигэ автора И.Н.Аммосов бэйэтэ буолар, кини улууһун, республикатын сайдыытын туһугар дьулуурдаах үлэтин, олоҕун сырдатар бэйэтин суруйуулара, чугас дьонун, үөлээннээхтэрин, бииргэ алтыспыт, үлэлээбит салайааччыларын, үлэһиттэрин истиҥ-иһирэх ахтыылара киирбиттэр. Элбэх хаартысканан матырыйаалынан байытыллыбыт, эдэр дьоҥҥо үтүө холобур буолар дьоһун кинигэ.Көрсүһүү кыттыылаахтара бэйэлэрин тустаах боппуруостарыгар сөптөөх эппиэттэри ылан, санаа атастаһан, көдьүүстээх кэпсэтии буолбутуттан астыннылар. Түмүгэр Иннокентий Николаевич эдэр салайааччыларга бэйэтин кинигэтин бэлэхтээтэ, үтүө баҕа санаатын, сүбэлэрин тиэртэ.