Айыллаан…Айыллаан аанын аһан-сабан төһө элбэхтэ киирбитэ-тахсыбыта буолуой мин кэргэним, аҕабыт, эһэбит Василий Васильевич Кузьмин.Урут бэйэтин кэмигэр ньиргийэ олорбут үлэлээх-хамнастаах народнай театр бу сценатыттан билсиһэн, кэлин ол билсиһиибит  таптал нарын иэйиитигэр кубулуйан ыал буолан, үс оҕону күн сирин көрдөрөн уонча сиэнинэн симэнэн  түөрт уон сылбытын толору томточчу дьоллоохтук олорон кэлбиппит. Ол былаһын тухары  бу сценаҕа төһөлөөх элбэхтэ ыллаан ньиргиппитэ буолуой, төһөлөөх элбэх араас таһымнаах образтары арыйбыта буолуой, төһөлөөх элбэх көрөөччүнү сүһүөҕэр туруоран, тапталын, хайҕалын ылбыта буолуой.Тапталлаах кэргэним,  аҕабыт, эһэбит  биһиги ортобутуттан  туоруоҕуттан кини сырдык аатын  үйэтитэр толкуйга түһэн биһиги дьиэ кэргэнэ, аймахтара,  культураҕа  бииргэ алтыспыт табаарыһа Валерий Петрович Герасимов  көҕүлээн бу эр дьон сольнай ырыаларыгар  конкурс ыытарга быһаарынан бу быйыл үһүс төгүлбүтүн республика ыллыыр куттаах эр дьонун күрэхтэрин ыыттыбыт.Быйылгы күрэххэ 21 кыттааччы республика араас улуустарыттан кэлэн  ыллаан-туойан ырыа кэрэ абылыҥар барыбытын суулаатылар. Бииртэн биир  кэрэ куолас, бу эр хоһууттар  үлэ быыһыгар ырыаны ымыы оҥостон ыллаан туойан кэрэни сыдьаайа сылдьаллара  наһаа да үчүгэй. Киһи үөрэр.Дьэ ол курдук, Тааттаттан, Хатастан, Амматтан, Мэҥэ Хаҥаластан, Уус Алдантан, Орто Халыматтан,  Дьокуускайтан уонна  улууспут нэһилиэктэриттэн кэлитэлээбиттэр.Сарсыардаттан дьону күүтүү, үөрэ-көтө көрсүү сүпсүлгэнэ буолла. Алаадьы, саламаат туппут сахалыы таҥастаах  кыргыттар киирбит ыалдьыттары утары үөрэ-көтө көрсөн айах туттулар. Сыыйа конкурсаннар бары кэлитэлээн  конкурс саҕаланна.Бүгүҥҥү күрэх дьүүллүүр сүбэтинэн үлэлээтилэр СӨ культуратын туйгуна, эстрада ырыаһыта Серафим Ксенофонтов, СӨ культуратын туйгуна А.П.Гоголев аатынан Чурапчытааҕы музыкальнай оскуола үрдүкү категориялаах преподователя Т. А. Петрова, А. П. Гоголев аатынан Чурапчытааҕы муз оскуола үрдүкү категориялаах преподователя, «Алгыс» ветераннар хордарын салайааччыта С. П. Аммосова.Бииртэн биир ырыаһыт тахсан ыллаан-туойан күрэх чааһа бүтэн эбиэт буолла, эбиэти манна бэйэтигэр эдэр оҕолор тэрийдилэр. Программа быһыытынан баран 5 чаастан  гала концерт саҕаланна, бу күннэргэ араас тэрээһиннэр үрдэ суох ыытыллан көрөөччү наһаа элбэҕэ суох да буоллар кэлбит көрөөччү киирбит ырыаһыты ытыс хабыллар тыаһынан уруйдаан-айхаллаан сүрдээх истиҥ көрөөччүлээх зал оргуйа олордо.Сцена аһыллаатын кытта Василий Васильевич экраҥҥа   спорт туонатын ыллаан ньиргиппит запиһын ыыттылар иккис куплеттан бары кыттааччылар ыллаһан ураты атын көстүү буолла.Чурапчы нэһилиэгэ тыа сирин түөлбэтин аатыттан Макарова В.В., Культура управлениетын аатыттан Попов Д.Д. тыл этэн эҕэрдэлэрин тиэртилэр. Дьүүллүүр сүбэбит председателэ Серафим Ксенофонтов, Амматтан Василий Васильевич  быраата Анатолий Седалищев,  Мэҥэттэн бастакы күрэхпит кылаан кыайыылааҕа Терентий Егоров бэйэлэрин кэрэ куоластарынан ыллаан  бу дьоро тэрээһини өссө тупсаран биэрдилэр.Күрэх кыттыылаахтара биирдии ырыаны ыллаан-туойан көрөөччү биһирэбилин, бравотын ылаттаатылар.Дьэ ол кэннэ долгутуулаах  түмүк тахсан, бииртэн биир кыттааччы наҕараадаланан кэлбит кыттааччы барыта илии тутуурдаах өттүк харалаах буолан сцена, зал  иһэ ураты  үөрүү сүүрээнигэр куустарда.Кылаан кыайыылааҕынан убаһа хаһаайына — Орто Халыма ыччата  ГуляевА.И. буолан үөрдэ-көттө, конкурсаннар бары да бу тахсан эрэр эдэр талаантан астына дуоһуйа үөрдүлэр- көттүлэр.Бастыкы миэстэни Чурапчыттан Сарыал Сивцев, иккиһи Таататтан Иван Беляев, үһүс миэстэни Чурапчы Одьулуунуттан  Иван Егоров ылаттаатылар.Дипломаннарынан Чурапчы Алаҕарыттан Иван Хон, Төҥүлүттэн Дмитрий Васильев, Төлөйтөн Владимир Смирников буолуталаатылар  уонна Василий Кузьмин ырыатын үчүгэйдик  толорон«Бастыҥ толорооччу» аатын Хатастан Дьулустан Гоголев, Уус Алдантан Андрей Никитин   ылаттаатылар. Онтон  атыттар  бары араас номинацияҕа тиксэн сертификат тутан үөрдүлэр-көттүлэр.Аҕабыт сырдык аатыгар тэриллибит конкурска бэйэлэрин үтүө баҕа санааларынан  спонсордаабыт дьоммутугар сэргэбитигэр  истиҥ махталбытын биллэрэбит:Бааскам бииргэ төрөөбүт эдьиийдэрин Марина Васильевна, Елена Васильевна, Анастасия Васильевна  оҕолоругар,Убайын Эдуард Алексеевич Кузьмин оҕолоругар, бииргэ төрөөбүттэрбэр, аймахтарбар, уолбар ИП Кузьмин С.В. дьиэ кэргэнигэр, Кытаанах орто оскуолатын бииргэ үөрэнэн бүтэрбит кылааһынньыктарыгар староста П.Ф. Максимовка,Чурапчытааҕы кииннэммит библиотечнай ситим директорыгар А.М. Смирниковаҕа, Чурапчы спорт упралениятыгар  Дь. В. Егоровка, Чурапчы  ( В.Д.Сивцев), Хатылы (В.Е. Попов), Болтоҥо( С.Н. Ефремов) тыа сирин түөлбэлэрин салайааччыларыгар, ООО «Саарба» (Ген.директор А. Г. Егоровка, Бииргэ үөрэммит одноклассникпар, ИП М.М.Пермяковка, Культураҕа бииргэ алтыспыт доҕотторугар, Бииргэ алтыһан ыллаабыт хорун коллективыгар салайааччы Н.М.Заболоцкаяҕа, Д. П. Коркин аатынан Чурапчы  респ. олимпийскай эрэллэри бэлэмниир интэрнээт оскуола директорыгар С.А. Захаровка, АО Амма Даймонд коллективыгар  директор Т.В. Ноевка. Биирдиилээн дьоммутугар- сэргэбитигэр: Сардаана дьүөгэлэригэр Решетникова Т.Н., Кузьмина А.Д., бииргэ үлэлиир коллегаларыгар Иванов А.О., Макарова Л.М., Логинова  А.П., Долаан Р.В. дьүөгэтэ ИП Александрова С.Д. «Дом цветов маҕаһыына,Дьүөгэлэрбэр  Попова А.Ф, Трофимова В.Д. Макарова Е. И. Кузьмина А.М. Кузьмина М.С. барыгытыгар барҕа махталбытын тиэрдэбит.Наһаа үчүгэй тэрээһини тэрийэн ыыппыттарыгар И.И.Кандинскай аатынан «Айыллаан»  сынньанар киин  эдэр коллективыгар (Титова С.В.), Культура управленията( Гуляев П.Е.) массыына өҥөтүнэн көмөлөспүтүгэр барҕа махталбытын тиэрдэбит.Бары спонсордаабыт дьоммутугар сэргэбитигэр кэрэни сырдыгы, доруобуйаны, үлэҕэ, олоххо ситиһиини, дьолу- соргуну баҕарабыт. Махталы кытары Клара Егоровна, Инга, Дмитрий Слепцовтар, Анастасия, Стас Кузьминнар, Сардана, Руслан Приходько, сиэннэр.