«Таайтарыылаах таҥха киэһэтэ»

Тохсунньу 16 күнүгэр Е.А.Борисов аатынан киин бибилэтиэкэҕэ “Таайтарыылаах таҥха киэһэтэ” буолла. Былыр былыргыттан тохсунньуга биһиги өбүгэлэрбит таҥха иһиллииллэрэ. Таҥха Хаан киһи дьылҕатын туһунан тугу этэрин айылҕа бу дьикти кэмигэр билгэлэнэн инникилэрин торумнанан көрөллөрө.

Билиҥҥи кэмҥэ баҕа санаа хаартата диэн тылы элбэхтэ истэр буоллубут. Хаарта киһи баҕа санаатын хайдах толороруй? Аныгы үөрэх этэринэн, биһиги дьайыыларбытын, олохпутун эт мэйиибит ­буолбакка, ис, түгэх өйбүт (под­сознание) салайар эбит. Ону бэйэбит да билбэппит.Түгэх өй санааны, саҥарар саҥаны үчүгэйдик ылыммат, арай, уобарастаан көрүү, иэйии тылын өйдүүр. Ол эбэтэр, хартыыҥканы көрө-көрө, баҕа санааҥ ­туолбут курдук санаан, ол онтон дуоһу­йан, астынан, үөрэ-көтө сыһыаран кэбиһэҕин. Кэмиттэн кэмигэр көрө сылдьан, эмиэ туолбутун курдук санаан, үөрүү, астыныы ­иэйиитинэн “аһата” сылдьаҕын. Ити ньыма нууччалыы “визуализация” диэн ааттанар. Маннык хаартаны ааҕааччыны кытта үлэлиир салаа  бибилэтиэкэрэ В.Е.Маркова, оҥотторон, кэлбит дьон астынан бэйэлэрэ оҥорбут баҕа санаа хаарталарын илдьэ бардылар.

Кэлбит ыалдьыттарга бибилэтиэкэрдэр В.П.Лонгинова, Л.Т.Никитина таҥха оонньууларын ыыттылар, сыллааҕы гороскуобу сырдаттылар.

Ону тэҥэ ыҥырыылаах ыалдьыттар кэлэн арааһынай оонньуулары оонньоттулар, хаартынан да сэрэбиэйдээтилэр, инникилэрин да билгэлээтилэр. Ол курдук: «Үс кут» диэн трансформационнай оонньууну Айыы Кыыма ыытта.

Киһи дьылҕатыгар, кини төрөөбүт күнэ, чыыһылата, аата-суола хайдах дьайарын Наталья Сибирякова «Нумерология» уонна «Матрица судьбы» ньымаларынан баҕалаах дьоҥҥо оонньотто.

Инникини билиэхтэрин, билгэлэниэхтэрин баҕарар дьоҥҥо өйү-санааны сааһыланарга Куйаар Куо уонна Алтаана Аманаттаах билгэлээтилэр.

Таро хаартыны интэриэһиргиир дьоҥҥо анаан Виктория Максимова сэрэбиэйдээн дьон ыйытыктарыгар хаарты быраҕан кэпсээтэ.