Сэтинньи 13 күнүгэр Е.А.Борисов аатынан киин бибилэтиэкэҕэ А5а дойдуну көмүскээччилэргэ аналлаах, ол иһигэр анал байыаннай дьайыы кыттыылаахтарын сырдатар, «СВОи родные» диэн киэҥ хабааннаах быыстапка тэрилиннэ. Быыстапкаҕа Аҕа дойду сэриититтэн саҕалаан, Афганистан, Чечня сэриилэрин туһунан стендэлэр, кинигэ быыстапката туруорулунна. Ону тэҥэ биһиги улууспутуттан анал байыаннай дьайыы кыттыылаахтарыгар аналлаах кинилэр хаартыскалара, бойобуой наҕараадалара, туттубут маллара көрдөрулуннэ. С.К Макаров аатынан Чурапчы гимназиятын уонна С.А.Новгородов аатынан Чурапчы орто оскуолатын үөрэнээччилэрин «Саллаакка суруктара» уонна сахалыы харысхал оҥоһуктара быыстапкаҕа турдулар. Быыстапкаҕа турбут кинигэлэри, ыстатыйалары, альбомнары бибилэтиэкэ үлэһиттэрэ кэлбит дьоҥҥо сиһилии сырдаттылар. Быыстапка аһыллыытыгар Чечня сэриитин кыттыылааҕа, полиция үлэһитэ Сивцев П.Р., СВО кыттыылаахтара Холмогоров Д.А., медик Сорокоумова А.И. уонна саппаас майора Никитин С.И. тыл эттилэр, киһини долгутар ахтыылары оҥордулар. Эдэр ыччат аатыттан Чурапчытааҕы физкультура уонна спорт институтун устудьуона Григорий Габышев «Боотур” байыаннай-патриотическай кулууп үлэтин билиһиннэрбитин кэлбит дьон сэргээтилэр.  Бу тэрээһиҥҥэ элбэх эдэр ыччат, оскуола үөрэнээччилэрэ кыттыыны ылбыттара төрөөбүт дойдуга тапталы, бэриниилээх буолууну иитиигэ улахан суолталааҕын бэлиэтиибит.