Сиэр-майгы
- Адьарайдыын алтыһарга ананан айыллыбыт киһиэхэ сырдык санаа сыстыбат.
- Айылгытыттан аттарыылаах киһи, тэпсиллибитин иһин, үтүөҕэ эрэлин сүтэрбэт.
- Алҕаскын арыгынан сууйбаккын.
- Алааһымсах саха амарах майгылаах.
- Арыгы уонна наркомания дьаллыгар ылларыы, бэйэ баҕатынан сиэмэх кыылларга утары киириигэ холоонноох дьайыы.
- Алҕаһаабыты амарах сыһыан кэскиллиир.
- Бигэтик туппутун саха дэбигис ыһыктыа диэн саараама.
- Биири арбаары атыны баһааҕырдыы – сиэри кэһии.
- Дьахталлар арыгынан үлүһүйүүлэрэ, чиэстэрин харыстаммат сэлээрчэх майгылара, содур быһыылара – эстэр-быстар омугу эрдэттэн сэрэтэр чинчи.
- Дьон олоҕун олохсуйбут үгэс түстүүр.
- Илии тарбахтара быһыылара эрэ буолбакка, олоххо туттуллар аналлара эмиэ араас. Киһи майгыта онуоха холоонноох.
- Итиигэ-буһууга хаарыйтаран ааспыт урааҥхайдар былыргы кырдьаҕастара: «Сиэргин-майгыгын эдэргиттэн харыстан”, — диэн, олохторун салгыыр аналлаах ыччаттарыгар кэбэҕэстик ситиһиллибэт эркээйи тыллары этэн хааллардахтара.
- Ким да билбэт, киһиттэн айыыһыта арахсан, адьарайа хаһан киирэрин.
- Күөл уутун ураҕаһынан сабаабыттан суол-иис хаалбат.
- Көлүүр оҕуһа, хардарбатаҕын иһин, охсуллубутун умнубат.
- Күрүөһүтү тохтоппоккун, сүллүгэһи сүгэн да ааһыаҕа.
- Кыараҕас ыча киһитэ ылыныгас. Бүтэй алаас олохтооҕо чычаас.
- Кырыыс ылынар киһи уйулҕатын моруулуур
- Нэҥэй киһи угунньаны оруур саҥнаах.
- Омукка охсуулааҕын билэ-билэ, кыһалҕалаах түгэҥҥэ соруйан күөртүүр насинтэлигиэнсийэ чороҥ дьоно өрүү бааллар.
- Оҥорбут очурдарын дьон аймах бэйэтэ тэҥниир аналлаах.
- Өйдөөх-төйдөөх турукка сылдьар киһи эппит тылларын кэм-кэрдии ааспытын кэннэ атыннык ханарытан тойоннооһун сиэрдээх майгы буолбатах.
- Сил да силлэнэр сирдээх. Тыл этиллэр тоҕоостоох.
- Сиргидэҕиҥ сиэрэ ситэриллэн айыллара судургу.
- Сыыһа туттууттан аллаах ат уу дьоруонан айанныыр үрдүк Айыыларынан анаммыт аартыга сабыллар.
- Тыл тибиириллэр сил буолбатах, ытыскар тоһуйтарбат, илиигэр туттарбат.
- Үгэһи кэһии үтүргэннээҕин умнума.
- Үгэһи тутуһууга оҕону утары олордон уһуйбаттар, ол иһин умнуллара судургу. Тулалыыр эйгэттэн оҕо бэйэтэ иҥэринэр.
- Үтүө киһи үөҕэрэ да үөрүүлээх. Ол эрээри өҥнөөхтөр өттөйөллөрө өһүөннээх, ыйааһыннаах ыххайара ыарыктаах.
- Үтүө өҥө дьон өйүттэн-санаатыттан дөбөҥнүк сүтэр.
- Үтүөмсүк куолуһут көмүскэммэти көмүскүүр.
- Хара санаа, ньоҕой сигилии айылгытыттан иэстэбиллээх.
- Иэс төлөннөҕүнэ олох сүнньүн булар.
- Ытыстан уу тэстэр, баҕалааҕы туппаккын.