Самаан сайын кэлбитинэн Чурапчы нэһилиэгэр киин болуоссакка Дьиэ кэргэн декадатын чэрчитинэн үгэскэ кубулуйбут “Сибэкки бырааһынньыга” ыытылынна. Бу дьон-сэргэ, олохтоохтор кэтэһэр, сөбүлүүр дьаһаллара Чурапчытааҕы киин бибилэтиэкэ көҕүлээһининэн 28-с төгүлүн ыытыллар. Күн бүгүн бу тэрээһин дьиэ кэргэн экэниэмикэтин бөҕөргөтүүгэ, күөх үүнээйини үүннэриигэ, көҕөрдүүгэ, сайыннарыыга төһүү күүс буолар.  Дьаарбаҥкаҕа оҕуруот аһын арааһа, сибэкки, талах мастар, көтөрдөр, атыы-тутуу киэҥ хабааннаахтык тэрилиннэ. Сибэкки бырааһынньыгар нэһилиэктэртэн биирдиилээн атыылааччылар, агро-оскуолалар, бааһынай хаһаайыстыбалар көхтөөхтүк кытыннылар. Үгэс быһыытынан атыылааччыларга анал ааттар олохтоннулар. Ол курдук: «Сибэкки эгэлгэтэ, эйгэбит симэҕэ» анал аат туттарылынна –Карсанаева Валентина Петровнаҕа (Чурапчы ), «Дэлэй рассаада, өлгөм үүнүү» — Пудова Руслана Руслановна (Чурапчы), “Сэдэх үүнээйи” – Захарова Надежда Георгиевна (Чурапчы), «Быйаҥы дэлэтэр сайдам ыал» — Трофимова Мотрена Кэнчэриевна дьиэ кэргэнигэр (Сылаҥ), «Кэскиллээҕи салайсан, быйаҥы уһансан» — Төлөй орто оскуолатыгар (сал. Деллохов А.В.). Быйылгы тэрээһиҥҥэ сибэкки, рассаада арааһын, солун талах көрүҥнэрин: вишня, яблоня, облепиха, жимолость талахтары, кустары, хаастары, олохтоох урбаанньыттар  бэйэ бородууксуйаларын олохтоохтор хамаҕатык атыылаһан үөрдүлэр, астыннылар. Улууспут олохтоохторугар быйаҥнаах сайыны, өлгөм үүнүүнү, этэҥҥэ буолууну баҕарабыт.