Алтынньы 25 күнүгэр Е.А.Борисов аатынан киин бибилэтиэкэҕэ “Саллаат мэлдьи саллаат» диэн Улуу кыайыы 79 сылын көрсө «Саҥа олох” хаһыат үрдүкү корреспондена, улуус бойобуой дьайыы бэтэрээннэрин Сэбиэтин бэрэссэдээтэлэ, гвардия сержана  Семен Александрович Жендринскай 3-с кинигэтэ күн сирин көрбүтүнэн сүрэхтэниитэ буолла. Саҥа дьоһун кинигэни Сахабэчээт Государственнай автономнай тэрилтэ Чурапчытааҕы “Саҥа олох» эрэдээксийэтэ 200 тирээһинэн 92 страницалаан бэчээттээн таьаарда. Кинигэ барыта 32 салааттан турар. Саха тылынан суруллан ааҕааччы киэҥ араҥатыгар ананар.Бу кинигэҕэ Аҕа дойду улуу сэриитигэр кыайыыны уһансыбыт, уоттаах кыргыһыыттан тыыннаах эргиллэн кэлбит, хаһан да ханна да ахтыллыбатах биир дойдулаахтарбыт хорсун буойуттар тустарынан ахтыылар, сэһэргэһиилэр, автор архыыптан хомуйсан ылбыт матырыйааллара уонна улуустааҕы “Саҥа олох” хаһыакка араас кэмҥэ үлэлээбит кэрэспэндьиэннэр суруйуулара киирдилэр. Ону таһынан Тыылга кыайыы туһугар сүрүн күүс буолбут, бэйэлэрин сэмэй кылааттарын киллэрбит оройуон үлэһит дьонун, дьахталларын туһунан кылгастык суруйбут. Кинигэ “Тыылга сүрүн күүс буолбуттара” диэн сэбиэскэй норуот уопсай улуу кыайыытыгар Чурапчы оройуонун дьахталлара киллэрбит кылааттарын туһунан ыстатыйанан түмүктэнэр.Бу тэрээһиҥҥэ Семен Александровиһы кытта бииргэ алтыспыт, бииргэ үлэлиир, кини үлэтин сэҥээрэр дьон улуус тэрилтэлэриттэн, “Чурапчы”  айар түмсүүттэн уонна улуус общественноһыттан кыттыыны ыллылар.