Ыам ыйын 22 күнүгэр бибилэтиэкэ ыытар үгэс буолбут «Сайылык күнэ» ыытылынна. Саха төрүт үгэһин тутуһан кинигэ быыстапката, иһитэ-хомуоһа, туттар мала-сала дьон көрүүтүгэр тупсаҕайдык оҥоһуллан турда. Кэлбит дьону сахалыы сиэринэн ыраастыыр туому ыытан, сахалыы астаах остуол тардан көрүстүлэр. Манна бэйэлэрин билиилэрин дьоҥҥо тарҕатар үтүө-мааны далбар хотуттарбыт Кондратьева К.П. үрүҥ ас эгэлгэтин, Бурнашева В.Г. ситии хатыытын, Ермолаева Л.А. бэйэ аһытыытынан астанар бурдук астар тустарынан көрдөрөн, быһааран кэпсээбиттэрин дьон сэҥээрдэ элбэх ыйытыыларга эппиэттээтилэр. Икки хамаандаҕа арахсан сэппэрээтэр күөрчэҕин хомуйуутугар, баттах өрүүтүгэр, сахалыы ынах ааттарын ааттааһыҥҥа уонна ынаҕы сааһынан араарыыга тыҥааһыннаах күрэхтэһиини Лилия Тихоновна бэрт сэргэхтик ыытта. Сиэр-туом туһунан Вероника Маркова сиһилии өйдөнөр гына кэпсээтэ. «Дьиэрэй» хомусчуттар ансаамбыллара биэчэри киэргэттэ. Дьоро күн сайыны көрсүү диэн «Чурапчы оһуохайынан» түмүктэннэ.